الطائره الشهيده

اه يا بلدي ..قوليها كمان اه
اسقيها نار تكوي الزمان في حشاه
ملعون ده زمن..عايش فيه متغرب
من غير حقيقه و الحق فيه تايه
و الدنيا غابه كئيبه و الكل ساكنها
و الكدب اصبح عقيده له ناس و دعاه
يا رب لولا حكمتك و الكل يجهلها
لقلنا..يا ريت ما كنا و لا كانت الحياه
......
طياره فوق المحيط ماشيه بتتبختر
شايله قلوب تشتاق لقلوب تستنظر
الاب واضع لعبه بنته قدامــه
يحلم بقبله بريئه و كلمه بابا اتشكر
و الام عايزه الساعات تجري في ثواني
انا راجعه يابني قوام مش راح اتأخر
و في كل الوجوه بسمة حلوه مرتاحه
و عقول كبيره و في اللي جاي بتفكر
ترسم خططها و عارفه ازاي تتنفذ
مين يعلم الغيب و اللي كان متقدر
الحلم انضرب في لحظه لعينه و الامل شنقوه
و بجسم الشهيده و البشر قاع المحيط فرشوه
و اللي كان و الي جري دول اكيد عرفوه
بس مين يقرا الحقيقه و مين يسمعها
و الغدر بينهم شريعه و كتاب حفظوه
....
صندوق اسود لعين هم اللي صنعينه
و من قلب قاع المحيط هم اللي نشلينه
و من معمل بسرعه لمعمل خدوه..هم اللي عرفينه
و مهما قال من كلام يتفسر لصالحهم
و السر يموت ويقولوا هم اللي عايزينه
......
حنسمع كلام فيه يبان مين غلطان
حيقولوا قائدها..دا كان مكتئب تعبان
و التاني..مصمم ينتحر من دنيته قرفان
و يمكن يقولوا ارهابي من دينكم عملها
و القاتل يبقي البريء ..و البريء هو المدان
..
ابكي يا زمن و اشعلها نار في قلوبنا
خلي العيون تنزف و تغرق مضاجعنا
حنبكي ع اللي فات و لا علي حالنا
دا ليلنا طال و قرب..نهايته مش باينه
و الشمس غابت عننا و حلفت ما حتشوفنا
.,.,.,.,.,.,.,.,.,.,.,

جميلة جدا جدا

تسلم ايدك

بجد فوق الرائعة

والله الدكتور دة فنان

فاهم اللى بيجرى و بيعبر عنة كويس

شوفلنا اى حاجة منة تانى

ميرسي ليكوا بس مش عارف ممكن ابقي اجيب تاني بس الواحد فين لما بيلاقي حاجه من عنده ان شاء الله هاحاول

جميلة جدا

ربنا يكرمك