السبب الرئيسي في تأخر تقدم مصر!

العمل

بس انا مش شايفه الصورة صح اوى

على حسب فهمى ليها ..انك كل ما تمشى خطوتين حد يرجعك

هو فى كل الدنيا لو حد مشى خطوتين لازم يلاقى عقبات توقفهو ممكن يتراجع

بس اى انسان لو خلى عنده اصرار و تجاوز العقبات دى ..هيكمل و يكمل و يكمل ان شاء الله

الإيد دي إيد حكومية ... مش أكتر

بغض النظر عن ايد مين ..انا مش شايفة ان حد يقدر يمنع حد عن تحقيق حلمه لو حلمه صح و هو متوكل على الله و مصر يوصلله ..

و بالعكس الحكومة بتساعد الشباب على عمل المشاريع و بتديهم قروض و اراضى حسب ما اعرف

و محدش يقولى لا و دة كلام و انتى متعرفيش حاجة ..هو كان حد جرب و معرفش يعمل حاجة ..لازم منسمعش اراء الناس اللى بتحبط و بس ..نجرب و نحاول و باذن الله نوصل لاهدافنا

اختصاراً من يظن أن هناك حكومة عربية تساعد شعبها ... فقد أخطأ كثيراً في حق الشعب !
بمرور الأيام هتعرفي إنك كنتي تظني ظن كويس في الحكومة وهتعرفي إنه مكانش في محله
لكن أكيد محدش يقف عن أمل أو طموح أو حلم ... إحنا بنواجه جبهتين دلوقتي بنواجه الظروف والحياة وبنواجه الحكومة

مش مختلف معاكي غير في إنك متفائلة بالحكومة ... تفاءلي بس مش بالحكومة .... بنفسك و بأحلامك
ربنا يكرمك

مش مختلف معاكي غير في إنك متفائلة بالحكومة ... تفاءلي بس مش بالحكومة .... بنفسك و بأحلامك

عندك حق

اخويه الصغير شاف الصوره دى اول لما الصفحه فتحت

قعد يضحك ضحك وقال ايه ده ده عمره ما هيتحرك من مكانه كل ما هيجى يمشى الراجل هيرجعه

ويضحك اوى ومعجب جدا بالصوره وبيألس على الراجل اللى بيرجع

وقال ده غبى ما يجرى بدل ما هو ماشى براحه وبيخلى الراجل يرجعه تانى !!

معرفش اذا كان هو فاهم الصوره ومعناها ولاايه ؟

بس قال حاجه انا من ساعه ما شوفت الصوره عمرى ما فكرت فيها

(انا شوفت الصوره فى توقيع واحده قبل كده وكانت كاتبه ان دايما هتلاقى

ناس توقف قدام احلامك وعندك خيارين لائما تسبهم يتحكموا فيك وتفضل عمرك كله محلك سر

يا ئما تتوكل وتعمل اللى عليك وتقرر وتتحكم انت فى نفسك بدل ما حد تانى يتحكم فيك )

قال هو ما بيجريش ليه ؟

انا فهمتها على ان الانسان ممكن لو لاقى عوائق يحاول يعديها بسرعه

ما يقفش كتير عندها علشان ما ترجعهوش

يحاول يتعداها ويسبقها هو وتبقى هى وراه وساعتها هيبقى هو المتحكم مش هى ؟

مش عارفه كلامى صح ولا لا ؟

بس انا فهمت كده وفسرت كلام اخويه كده

طبعاً صح مفيوش غلط ... بس على فكرة كلام أخوكي فعلاً صح ... لو الراجل ده جري كان هيعدي الحتة اللي كل مرة يرجع فيها دي ... وده لو طبقناه على الواقع العملي هنلاقي إنه منطقي وحل كويس جداً ... الحتة اللي عارفين إننا بنقع فيها نعديها ونبقى بعد م نخلص نرجعلها تاني نصلحها
ربنا يكرمه .. سلميلي عليه رغم إنه مكانش عاجبني من ساعة حكاية السفرية دي لكن الحمد لله روحتوا وجيتوا بالسلامة وإن شاء الله دايماً ... وربنا يكرمك

هو انتوا بنفسكوا كدة جربتوا تشتغلوا و حد منعكوا

مين قال ان الكلام دة صح

بصوا غالبا مش هتناقش تانى هنا (مش زعلانه منكوا و لا حاجة ) .بس من الاخر دة راى انا مصرة عليه و حتى لو اعدتوا تجيبولى مليون دليل و لو اقنعتونى باي حاجة انا مش مقتنعه غير بانى مبحبش احكم حكم عام على ناس كتير بدون ما اكون جربت فعلا

اكيد لازم نؤمن باحلامنا وبقدراتن وبالنسبه للحكومه اكيد فى سلبيات بس انا فى المجمل عجبنى اداء الحكومه المصريه وخصوصا الاقتصاديين المصريين والسلبيات دى لودققنا النظر فيها شويه هنلاقى معظمها مما كسبت ايدينااااا

لأ ....أنا مكانش قصدي يحصل كدة والله ولا تزعلي ولا تضايقي من الكلام ولا حاجة ... أو حتى لو مزعلتيش برضه احنا هنزعل إنك مش هتتناقشي معانا .... مينفعش تسلمي من أول خطوة كدة .... أصلك مجربتيش الحكومة .. فيه ناس كتير مجربنهم لكن كل واحد غير التاني بس برضه محدش ييأس ... وسيبك من كلام الاعلانات و إعلانات مصر بتستهبل فيها ( قصدي بتتقدم بينا) بمين؟ مش قصدهم بالشعب قصدهم بالحزب الوطني ... الموضوع كبيييييييييير أصلاً
لكن أولاً أنا متفق معاكي في موضوع محدش يقدر يحكم على حد غير لما يجربه .. ولو كنت أنا بعملها وبتطلع صح لكن مش دايماً طبعاً
وأرجو ترجعي تتناقشي تاني و ولا يهمك خالص
ربنا يكرمك

the traveller كتب:

اكيد لازم نؤمن باحلامنا وبقدراتن وبالنسبه للحكومه اكيد فى سلبيات بس انا فى المجمل عجبنى اداء الحكومه المصريه وخصوصا الاقتصاديين المصريين والسلبيات دى لودققنا النظر فيها شويه هنلاقى معظمها مما كسبت ايدينااااا

دقق انت بس في برنامج الطبعة الأولى اللي بيجيب كل الأخبار الملفتة وبالذات في الحكومة ... وشوف المهازل اللي مكتوبة على لسان ناس مسؤولة
ربنا يكرمك

بشوفه وبحب احمد المسلمانى جدااا
طب اقولك على خبر غريب : عارف فيلم حين ميسره بتاع خالد يوسف كان احمد المسلمانى من اكبر المهاجمين للفيلم ده ولافلام خالد يوسف
معاك فى سلبيات للحكومه بس سلبياتنا احنا اكتر
لو تابعنا اداء الاقتصاد المصرى من اول جمال عبد النصر لحد دلوقتى هتلاقى ان وضعنا افضل بكتير وفى تقدم انت النهارده عنك شركات عالميه موجوده فى بلدك مكنتش موجوده قبل كده او مين كان يفكر اصلا ان مصر تبقى ارض ارض خصبه للاستثماروتجيلك كل الشركات دى من كل انحاء العالم؟ بلدك هيا اول دوله على مستوى افريقيا فى جذب الاستثمارات الاجنبيه واكيييييد ده مجاش من الهوا
وبالنسبه للبرامج الى ماليا الفضائيات احنا الدوله العربيه الوحيده الى فيها النوع ده من البرامج
هتلى دوله واحده تسمح لبرنامج من النوعيه دى انه يبقى عندها وده شئ يحسب لينا

لأ .. معلش احنا بيسيبونا نعمل البرامج دي على القنوات الفضائية مش علشان الديمقراطية لكن علشان مش بيتابعوا تقريباً معندهمش دش
احنا المفروض نغير من نفسنا وهما يغيروا من نفسهم برضه علشان كدة كلنا هنتغير لكن محدش عايز يقوم بالخطوة الأولى
يارب حد يبدأ

hanzala كتب:

لأ .. معلش احنا بيسيبونا نعمل البرامج دي على القنوات الفضائية مش علشان الديمقراطية لكن علشان مش بيتابعوا تقريباً معندهمش دش
احنا المفروض نغير من نفسنا وهما يغيروا من نفسهم برضه علشان كدة كلنا هنتغير لكن محدش عايز يقوم بالخطوة الأولى
يارب حد يبدأ

انا قريت الموضوع من الأول وعجبتني جدا الأراء الموجوده
وممكن نشوف الصوره من كذا ناحيه :
ممكن نقول إن مهما الإنسان تقابله صعوبات فهو مش بييأس وبيكمل شغل
وممكن ننظر ليه من ناحيه تانيه إن الإنسان اللي في الصوره ديي غلطان عشان بيقابل صعوبات في طريق ورغم كده بيرجع يمشي تاني في نفس الطريق والمفروض يجرب طرق تانيه عشان يوصل لهدفه
لكن بالنسبه لموضوع الحكومه انا مع رأي ترافلر من حتة الأداء الأقتصادي فعلا الحكومه بتاعتنا نجحت إنها توفر ارض خصبه للشركات عشان تنزل مصر وده بيفرق كتير في الاداء الاقتصادي للدوله
وموضوع القنوات الفضائيه انا شايف إن معظمها بيسوء لسمعة مصر في الدول العربيه وإن ده كان سبب رئيسي في أزمة التحامل العربي على مصر ساعة موضوع غزه الأخير لأن القنوات الفضائيه قبل العدوان كانت بتنشر كل كبيره وصغيره بتسيء لمصر ولما جه الموضوع بتاع غزه حصل كله زاد فيها (يعني احنا مش بنحترم بعضنا يبقى مننتظرش من الأخرين إنهم يحترمونا) والمفروض المساويء دي ايا كانت يتم تداولها داخل نطاق الدوله ومش لازم الفضايح والتهويل الإعلامي اللي بيحصل

طب ليه يوم م بننشر داخلياً فضايح بجد علشان تتصلح مش علشان الفضيحة بس ... بيترد عليهم من الحكومة إنكوا بتهولوا وغاويين صحافة وخلاص ؟ أنا مش بتهمك انت ولا أي حد ... لكن لا أنفي التهمة عن الحكومة برضه

يعني ايه بننشر فضايح داخليا؟

تمااااام يا محمد

ليه ياسمير؟ معظم البيوت عندها دش دلوقت والنص التانى مدخل السلكه

على فكره ياجماعه مصر مستهدفه من كل ناحيه احنا (شباب الجانعات)مستهدفين ومن كذا جهه خدوا بالكوا مش عيزين نيأس ابدا
احنا البلد العربيه الوحيده الى عرفنا نرجع ارضنا كامله اللهم لك الحمد فالموضوع ده مخلى بعض اخونا مضبقبن شويه ومغلولين
فاحنا مسلهدقين مش عيزين ندى فرصه لاى حد انه يزعزع حبنا وانتمائنا لبلدنا بلدنا هيا اغلى حاجه عندنا وحتى لو كان فى عيوب فا بمجهودك وبمجهودى وتوكلنا على الله ان شاء الله هنحقق كل الى نفسنا فيه

هو ده الكلام ... لكن إن شاء الله نطبقه مع بعض كلنا

hanzala كتب:

طبعاً صح مفيوش غلط ... بس على فكرة كلام أخوكي فعلاً صح .

اخويه ده فلته مع ان عنده عشر سنين
يارب يطلع مهندس يااااااارب

.. لو الراجل ده جري كان هيعدي الحتة اللي كل مرة يرجع فيها دي ... وده لو طبقناه على الواقع العملي هنلاقي إنه منطقي وحل كويس جداً ... الحتة اللي عارفين إننا بنقع فيها نعديها ونبقى بعد م نخلص نرجعلها تاني نصلحها
ربنا يكرمه ..

امين يارب

سلميلي عليه رغم إنه مكانش عاجبني من ساعة حكاية السفرية دي لكن الحمد لله
روحتوا وجيتوا بالسلامة وإن شاء الله دايماً ... وربنا يكرمك

امين يارب
بس ده مهما كان طفل وهو خواف ربنا يهدى بقى