السلام عليكم
أولآ أحب أعرفكم بأطراف الموضوع
الطرف الأول : أنا
الطرف التانى:نفسى
الطرف التالت:انسانه ما أعرفهاش ولا تعرفنى
ندخل فى الموضوع......
من يومين تقريبآ كنت بسأل على حاجه فى موقع على النت
والموقع ده مشترك فيه ناس زمايل ليا وتقريبآ بنشوف بعض كل يوم بس ماحدش يعرف التانى ولا لينا كلام مع بعض يعنى زمايل مكان بس
المهم...
ردت عليا زميلة مشكورةوأجابت على سؤالى وقالتلى أعمل ايه وعرضت عليا حاجه تسهل عليا الموضوع اللى كنت بسأل فيه
طبعآ ربنا يكرمها وجزاها الله كل خير
وبعدين أنا رديت عليها عشان أشكرها وأنسق معاها أزاى ها تساعدنى فى الحاجه دى
وبدأت رسالتى دى بمداعبه خفيفه (يعنى جمله قولتها ) ووضحت بجانب الجمله انى بهظر معاها ومعتبرها مثل أختى
وهنا ظهرت المشكله
لاقيتها ردت عليا واللى فهمته أو حسيته من كلامها أنها خدت الجمله دى على اساس انها معاكسه
مع العلم
الجمله دى شائعه جدآ جدآ جدآ
فى كل حته فى الشارع فى التليفزيون فى أى مكان
وممكن تتقال لأى حد يعنى ولد أو بنت كبير أو صغير أى حد
وبعدين بالله عليكم ..... أنا قولت فى توضيحى للجمله معتبرك مثل أختى
هل أنا ممكن هاقول حاجه فيها اساءة لأختى .... يعنى أكيد طلاما رضيتها على أختى يبقى ما فيها أى اساءة
أنا رديت عليها وأعتذرتلها وقولتلها
أنا أسف فعلآ أنا غلطان وما كانش مفروض انى أهزر معاكى هزار من أى نوع سواء ده ولا غيره وسامحينى
نيجى للمشكله
ان أنا مهما أعتذرت لها ها تقول ان أنا ببرر موقفى وكده ببقى بأكد وجهة نظرها
مع أتى أعتذرت أحترامآ لرغبتها فى عدم الهزار مش لأنى أخطأت
وصميم المشكله هنا
انها ظنت فيا ان انا انسان مش كويس و سىء الخلق
وأنا مش عارف أدافع عن نفسى
لأنى قررت أنى ما اتعاملش معاها تانى لامن بعيد ولا من قريب
بالظبط كده كانه حكم واجب النفاذ ...و انت مالكش حق الأستئناف
مع أنى حسمت الموضوع مع نفسى وقولت
ربنا وحده عالم بنيتى وهو اللى هايحاسبنى مش هيا
بس برده لسه حاسس بشىء فى نفسى من الظلم ليا وحاسس انى مش مرتاح
ياريت لو أى حد عنده أجابه تريحنى شويه...يقولى
ماذا يفعل لو كان مكانى
التائه فى نعم الله
تيمو
(يأيها الذين أمنوا اجتنبوا كثيرآ من الظن ان بعض الظن اثم )
صدق الله العظيم
الحجرات..... الأية (12)