بدون عنوان

انا عايز اقول لكل طلبة كلية التجارة بصفة عامة والمشرفين على الموقع واسرة شباب النيل بصفة خاصة انا اسف جدا علي انا عملته وعلى فكرة الاسف مش عشان انا قرات اراكم شعوري بالذنب والندم جاني بعد كتابة هذه المشاركة البذيئة مباشرة والله العظيم هذا الكلام خقيقي وبعد ماكتبت هذا الكلام رجعت نفسي وقلت اللي انا عملته في زملائي وارجو انكم تعتبروني معلش مؤقتا زميل لكم مع اني استخقش اني اكون زميل لناس بالشكل الرائع ده ويدافعوا عن بعضهم بالشكل ده ربنا فعلا يكرمكم انا اسف للمرة المليون ولو ينفع ابعت لكل واحد في الموقع رساله خاصة فيها اسفي وندمي عي هذا الفعل الدنيء كنت عملتها ارجو ان تتقبلوا اسفي مرة تانية وانا مش هضايقكم تاني ومش هشترك في الموقع عشان اريحكم مني

خطوة جريئة منك اهنيك عليها

و انت فى الاول و فى الاخر اخ لينا

و احنا لما اعترضنا مكنش بس بغرض الدفاع عن الاسرة

لا دة كان عشان ننصحك و نعرفك ان فكرتك غلط عن الناس دى

و صدقنى لو كانت الاسرة هى اللى غلطانة كنا هندافع عنك زى ما دفعنا عنها بالظبط

و زى ما قلتلك كلنا هنا اخوات و مفيش زعل بينا

و متنساش ان الاعتراف بالحق فضيلة

و طالاما انت اعترفت بالحق اكيد كل اللى كانوا متضايفين منك هيسامحوك

و كلنا بنغلط و العملية بتمشى

بس اهم حاجة ان الواحد يعترف بغلطة عشان ميكرروش

و انت ما شاء الله اعترفت و اعتذرت كمان

يبقى خلاص انت معلكش حاجة ان شاء الله

و يكون لينا الشرف انك تشترك معانا فى المنتدى سواء فى مواضيع او ردود

و ربنا يوفقك و يوفقنا جميعا

بالظبط زي مقال فرندس

كلنا هنا اخوات .. واحنا بشر عادي جدا ان احنا نغلط بس المهم ان احنا نستفيد من اخطاءنا ونتعلم منها .. على راي واحد صاحبي ( اللي هو انا برده ) الحياة تجارب واحنا بنتعلم منها


خلاص

عيش وتعايش معانا كأن مافيش حصلت واعتقد ان الناس هتسامحك وتتعامل معاك عادي جدا لاننا هنا اخوات

وربنا يوفقك في الامتحانات ان شاء الله

زى ما قال فرندس و قال عاشق الجنة ..

بجد اللى فات مات و احنا كلنا اخوات

و كلنا بشر و ممكن نعمل اى حاجة غلط و نتوب و ربنا ارحم الراحمين و بيغفر كل الذنوب و احنا كمان كلنا مسلمين و لازم نتسامح و ننسى اللى فات
و بجد احنا هنبقى سعداء اوى بمشاركتك معانا و سعداء جدا بموضوعك دة

و كلنا بجد بنحترمك جدا دلوقتى و معتبرينك اخ لينا .. و بجد موضوعك الاولانى كان سبب فى خير لينا و بين لنا حاجات مكناش واخدين بالنا اوى منها

فبجد انت افادتنا بيه ..بس صح كنا زعلانين منك ..لكن دلوقتى خلاص مش زعلانين و كمان مستفيدين

فاهلا و سهلا بحضرتك و نورتنا فى منتدانا او منتداك انت كمان لان كلنا كوميرساويين بننتسب الى كوميرس 2009 دفعتنا الجميلة ..أحلى دفعة

أهلا بأخونا الجديد ساسو ، في بيته التاني كوميرس


شعارنا ، اهلا بيك معانا ، وعيش حياتك وسط اخواتك


انا عايز ارد عليك بكلمتين حاسمين


كل بني آدم خطاء ، وخير الخطائين التوابون


{وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ} (34) سورة فصلت


اكيد انت دلوقتي عارف انت بقيت مين بالنسبة لنا ، وهتعمل ايه كمان

انا مش هلاقي كلام يوصف انا قد ايه مقدر إعتذارك ده ... ومقدر إحساسك اللي انت وضحته فوق

وانا شايف انك قدامك فرصه جميلة جدا عشان تدخل وتشارك أكتر في المنتدى لأن أغلب الأعضاء

دلوقتي بقوا عارفينك واعتبر الموضوع ده بداية جديدة جميلة وزي موضوع تعارف كده عرفنا فيه

الجزء الكويس الجميل منك ...وربنا يكرمك ويجازيك خير

وانت مقولتليش استلمت الشهادة ولا لسه برضه ولو لسه مستلمتهاش روح لجنة الأسر فوق

مدرج (ج & د) عشان تاخدها ويكون قبل الساعه 2 عشان الموظفين ميكونوش مشيوا ولو في اي

حاجه تقدر تبعتلي على طول وإن شاء الله أقدر افيدك

واهلا بيك مره تانيه معانا في المنتدى

إيه ده بجد؟
مش زي م قال فرندس و عاشق الجنة و ندى و محمد مجدي وكل الناس اللي سبقت في الرد
فيه كلام تاني لازم يتقال .. خد الجديد بقى
تعرف إني احترمتك أكتر .. علشان متخيلش إني ممكن يتعمل فيا اللي عملناه فيك وترجع تتأسف
غالباً طالما انت مش معروف ولقيتنا واقفين صف بندافع عن حاجة واحدة كنت ممكن تقول علينا شلة حرامية وتمشي متعرفناش تاني ... ولو ثبت لك العكس ( اللي هو الحق زي م حصل دلوقتي ) كنت هتقول في نفسك أنا ظلمتهم بس كنت هتكون مخنوق مننا برضه علشان هاجمناك ... لكن صدقني مكانش هجوم شخصي .. ولا كنا بندافع عن سرقة ...
كانت توصيل معلومة صحيحة وتصحيح أخرى خاطئة
بجد أنا سعيد جداً إني أشوف حد في الزمن ده بيتعذر كدة و يقول للناس
بس أنا مش متقبله !!
علشان انت مش عايز تكمل في المنتدى
مش قولتلك المواقف دي هتخلق مواقف أحسن بعد كدة
وعلى رأي الأمثال بتاعت ما محبة إلا بعد عداوة والكلام ده .. لكن طبعاً مكانتش عداوة الحمد لله وإن شاء الله تعتبرنا زي اخواتك وعفى الله عم سلف

أشكرك لإعتذارك .. وأهلاً بيك مرة أخرى ومن حقك تبتدي صفحة جديدة وحاول تغير كلمة ( طالب اتسرق) دي

سبحان الله والله العظيم اول لما شوفت عنوان الموضوع

قولت ده اكييد العضو ساسو بيعتذر

انت انسان محترم جداااا بجد انك تعتذر لما تعرف انك غلط

واللى كنت هقوله ادمين قاله

كلنا بنخطىء بس اللى بيعتذر ويرجع عن خطئه هو خير البشر

ربنا يوفقك ويكرمك ان شاء الله

وحضرتك بعد المشاركه تقدر تشارك بعضويه جميللله جدااا فى المنتدى

لان كل الاعضاء دلوقتى بيقولوا ان ده انسان محترم لانه اعترف بخطئه

كنت أتمني انك تشارك تاني يا ساسو


وفعلا تتاكد اننا بنقولك كده من قلبنا

بس الحمد لله برضه انك بتدخل وتنورنا عالمنتدي


وان شاءالله هيجي اليوم اللي تشارك فيه معانا وفعلا تعرف انك اخونا