جريمة بشعة في يوم غريب

بسم الله الرحمن الرحيم


اكتب هذا الخبر وانا احاول ان اسيطر علي نفسي واتماسك واتمالك اعصابي


فمنذ قرابة الساعتين

وأثناء صلاة العصر تقريبا


كنت اجلس انا وبعض الاصدقاء


واذا بتليفون احدنا يرن ، ويأتي لنا خبر عن جريمة قتل بشعة بمنطقة بين السرايات وامام المكتبات التي تبيع الاوراق للطلبة



فقررت ان اذهب لأتأكد بنفسي

ولأني كنت واثق من الخبر لأنه قد بلغ عن طريق احد الاصدقاء


وذهبت ، وكان الطريق في بدايته هادئ ، يوحي بأن هذا الخبر ما هو الا شائعة


وبدأ الامر يتغير كلما ذهب تجاه باب كلية تجارة

فتسمع بكاء وانهيار وناس تردد الكلام ذاته


الي ان وصلت الي مكان الحادث

واذ بجثتين لسيدتين او فتاتين ملقتان علي الارض يحرثهم ناس ممن يعملون بالمكان


والجثتان كانا مغطتان بالجرائد والكرتون


وحين رأيت الجثتين والزحام ومحالة دفع الذين يعملون بالمكان للناس الاتية لمشاهدة الجثث


وجدت نفسي لا املك قدماي ليحملاني

ووجدت نفسي امشي وسارح في ملكوت اخر


ولكن بعد حوالي اكثر من نصف ساعة

تأتي الاسعاف لترفع الجثث

وتصل الي المكان في حوالي ربع ساعة اخري ، بسبب الازحام ، سواء السيارات او الطلبة والمتفرجين


حقا شئ مؤلم


وهنا وقد ظهرت مواقف غريبة

فهناك من يضحك ، وخاصة من الفتيات ، وحقا عجبا لهم

وهناك من هو يبكي ومنهار ، وهم قلة قليلة


وهناك من هو خائف وهناك من هو متأثر


وقد بدأت الاشاعات تتوالي واحدة تلو الاخري

والي هذا الوقت الذي اكتب فيه هذا الكلام



فكان كلام يقول انه طالب مجنون قتل فتاتان وكان يجري ليقتل المزيد ولا احد يستطيع ايقافه

وكان هناك من يقول انه رجل قتل زوجته وحماته ذبحا وألقاهما من النافذة بمسكنه


وهناك من قال انه قتل زوجته وحماته وسط الناس


وهناك من يقول ان شاب ذبح خطيبته واختها ووالدتها


والله اعلم اين الحقيقة


ولكني انا واصدقائي لم أري الا جثتين


والجدير بالذكر


ورغم انه ليس بجديد ، ولكن لقد وصلت الشرطة بعد أكثر من ساعة تقريبا


علي الرغم من ان مديرية أمن الجيزة لا تبعد عن الموقع بأكثر من 200 متر تقريبا


حقا عجبا


ماذا كان الامر لو كان كما اشيع انه رجل مجنون يذبح في الفتيات واحدة تلو الاخري


كم كان عدد القتلي لولا ان اوقفوه وحبسوه في احدي العقارات تقريبا؟؟



ومما زاد اليوم اسغرابا


كانت سيارة تقف امام باب تجارة مباشرة


بعد ان شاهدت الجثتين ورجعت الي باب تجارة

كانت السيارة قد بدأت في الاشتعال وبدأ الدخان في الصعود


وبعد ان جاءت الاسعاف ووقفنا حوالي النصف ساعة وما يزيد


رجعت فوجعت السيارة قد ازداد انبعاث النيران منها اكثر ، بشكل رهيب

والكل كان يخشي ان تنفجر السيارة

وبدأت النيران تزداد وتصهر في السيارة


فقررت ان افتح السيارة بنفسي ، نتيجة للموقف السلبي من الجمع الهائل من الناس الذين يشاهدون هنا وهناك علي الجريمة


حاولت فتح باب السيارة بمفاح معي ، فقال لي بعض الناس ، أهذه سيارتك؟؟ قلت لا


والحمد لله قد نجحت في فتح السيارة ، ثم في شد يد الكابوت لفتح الموتور


فحينها بدأت الناس تتحرك لتساعد ، وجاءوا وفتحوا السيارة ، واوقفوا سيارات تمضي في الطريق ليأخذوا منهم طفايات الحريق


وبالفعل تم السيطرة علي الحريق بعد ان زاد وصهر صاج السيارة واتلف جزء كبير من مقدمتها



ولكن ما هذا اليوم الغريب العجيب؟؟

وما هذه السلبية من الناس تجاه سيارة تحترق وربما ان تنفجر وتؤدي الي كارثة؟؟

وما هذه العادة في ذلك الشعب الذي سريعا ما يتداول الاشاعات في لمح البصر؟؟



اللهم ارحمنا

بجد غريب

لا اله الا الله

اللهم ارحم امواتنا

وموقف شجاع منك يا هشام

وده لازم الناس الجبانة اللى فى الشارع تعمله

انا مش عارف فين الشباب وفين الشابات

اين الشعب السلبى

سحقا على هذة السلبية

اللهم اغفر لنا ولجميع موتانا

شكرا ليك على الموضوع وعلى الحرص الشديد لنقله لنا

وكمان انا عارف انت عامل ازاى دلوقتى

ربنا يكرمك ويجازيك خيرا يا هشام

لا حول و لا قوة الا بالله

ايه دة

ربنا يرحمهم و يحفظنا و يهدينا كلنا

السلبيه بقت مرض في المجتمع المصري فعلا

الناس بقت محدش يخاف علي حد

يعتقدون ان هذه التقدم

لا والله ان المجتمع الامريكى يقولون عنه (لو حد مات جبه واحد تاني مش هيتحرك)

انه كذبه كبيره ان المجتمع الامريكي يصرف ارقام مذهله

علي العمل الاجتماعي

يرحم الله الشهامه والجدعنه

من غير مع السلامه

سبحان الله ولا حول ولا قوه الا بالله
ربنا يرحمهم ويرحمنا

كلام سليم والله

ماتت فينا النخوة

لا حول ولا قوة إلا بالله
إيه اللي بيحصل ده
أنا مش عارف اقول إيه
أنا قريت بس اللي مكتوب والله أعلم بحالي دلوقتي
طيب إنت يا هشام اللي شفت الموقف ده قدامك عامل إزاي دلوقتي ربنا يطمنا عليك
إنا لله وإنا إليه راجعون
ولا حول ولا قوة إلا بالله

الموقف صعب اكيد

بس احنا رجالة المفروض برده يا صبرى ولا ايه؟

أيوه رجاله وكل حاجه
بس الموقف صعب أوي
خصوصا تناقض المشاعر لما تبقى في جثث على الأرض وفي ناس بتضحك طيب بيضحكوا على إيه نفسي أعرف مفكروش إنهم ممكن في ثانيه يبقوا مكانهم كده
لأ حاجه صعبه فعلا
واللي زودها أكتر السلبيه اللي عند الناس زمان كان لما بتحصل حاجه كله بيجري عشان يساعد
دلوقتي لما بتحصل حاجه كله بيجري برضه بس عشان يتفرج ويضحك
لا حول ولا قوة إلا بالله

للاسف الخبر طلع صحيح لاني سمعت الكلام ده من واحد صاحبي بس كنت فاكرها كلام و خلاص
ليه كده بس يا هشام
اللهم ارحم موتانا وموتي المسلمين

لاحول ولا قوة الا بالله
بجد مش عارفة اقول اية؟؟
يارب ارحمنا

الحمد لله انى كنت مشيت لان ابن خالى شاف المنظر من بدايته حتى نهايته و بجد ربنا يكون فى عونه ع اللى شافه
وللاسف الشخص القاتل انا اعرفه واتكلمت معاه كتير لانه بيبيع فى مكتبه المستقبل لدفعه سنه تانيه اصحابى

ومش متصور انه يرتكب جريمه بالبشاعه دى


ربنا يرحمنا وجميع اموات المسلمين
وربنا يحسن ختامنا جميعا

اكيد اللى بيحصل مش من فراغ لان ده من اعمالنا
وربنا يهدينا اجمعين

ده كلام منقول عن واحد يعرف الشخص اللي قتل خطيبته واختها وحماته
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
السلام عليكم

بصوا يا جماعة

مبدئيا .. الشاب ده قتل فعلا حماته وخطيبته واختها

فده خلاص حصل .. لكن الفكرة ان التفاصيل مختلفة تماما عن اللى ذكرت هنا

وكل جرنان ذكر تفاصيل مختلفة عن التانية

عايزين نتفق بس على حاجة .. اننا نحاول نعيش فى شخصية الشاب ده
وعايزين نتفق على انى مش ببرر ابدا ليه .. ولا حتى بدافع عنه او بحاول تحسين صورته علشان انا عارفه

اولا الشاب ده اتقدم لواحدة .. ارتبط بيها بعلاقة عاطفية باى شكل من الاشكال واتقدملها

منطقة بين السريات بينتشر فيها قصة الخوف من السحر والاعمال والكلام ده


وعائلة البنت دى مشهور عنها انها بتقوم باعمال سحر وشعوذه ودجل والكلام ده

فهو حس فى مرة بانه تعبان او حاجة زى كده .. وايقن انه معمولة سحر او عمل من الست دى
( انا غير مؤمن بهذا الكلام على الاطلاق واعتبره كلام فاضى من شعب محبط و مدمر اجتماعيا )

المهم انه اقتنع كامل الاقتناع بانه معموله زفت اى حاجة

فراح لناس يدعوا انهم شيوخ ويعالجوا بالقرآن

وواحد من اللى دماغهم متخلفة ربنا يخرب بيته وياخده فى داهية

حط فى دماغ الواد ده .. انه مش هيتفك عنه العمل ( الهبل ) ده الا لما يقتل حماته ويفصل راسها عن جسمها

وللاسف زينله ان ده الحل بتاعه .. وانها عملاله عمل علشان ميفسحش الخطوبة

المهم الشاب ده فعلا قرر انه يعمل كده ( علشان كده قال فى التحقيقات انه دلوقتى مرتاح )

وراح فعلا ودخل البيت بعد ما فتحتله خطيبته

ودخل على حماته وهيا قاعدة على الكرسى ودبحها

بعدها خطيبته من الذهول واقفة مش مصدقه .. فراح دبحها هيا الاخرى

وجت اختها من جوه تشوف ايه اللى بيحصل .. فصرخت ( جوه الشقة برضه ) فراح طعنها ما بين صدرها وبطنها

سبع طعنات وكام واحدة فى الوجه .. وماتت

وبعدها نزل الشارع فى حالة هيستيرية بيهلوس باى كلام .. لحد لما اتمسك فى الشارع


دى القصة الحقيقية .. انا عندي كام تعليق :

1- ان الشاب صحيح جاني .. لكنه ضحية للى اوعز اليه ان حله وراحة باله فى قتل حماته .. ولما كان هو مؤمن بانها عائلة ساحره فقرر انه يحمى البشرية منها للابد .. فقرر التخلص منهم جميعا

2- انه كان مقتنع ومؤمن تمام الايمان انه معمولة سحر وعمل .. ولما اللى اسمه شيخ بيعالج بالقرآن ده قاله انه مش هيرتاح ومش هيتفك العمل ده الا لما يقتل حماته .. فهو حط فى دماغه كده .. علشان كده قال فى التحقيقات انه خلاص مرتاح نفسيا
زى واحد يحط فى دماغه انه مش هيرتاح الا لما يشرب بيبسى .. فلانه عيش نفسه فى حالة معينة ان راحته هتبقى فى البيبسى فبيحس فعلا بكده بعد ما يشرب البيبسى .. دى حاجة نفسية طبيعية عند اى واحد طبيعي

3- السعودية البلد الوحيدة اللى بتنفذ الاعدام بقطع الرأس .. وعلشان كده لما بينفذوا الحكم فى اى واحد .. الراجل اللى شايل السيف وقطع رأس المتهم .. بعد ما بيضرب بالسيف ويقطع راسه بيجري عليه عشرة مثلا يكتفوه ويمسكوه مسكه رجل واحد .. وبياخدوه من قفاه ويحطوه فى بوكس عربية فاضي من اى حاجة ويسيبوه لوحده لمدة نص ساعة
الكلام ده بيعملوه علشان اى واحد بيعمل كده او بيشوف كده .. بتصيبه حالة هيستيرية لا اراديا .. وبالذات فى حالة قطع الراس وفصلها عن الجسم .. بتبقى الحالة اشد واصعب .. ولازم ياخد فترة لحد لما يستوعب اللى حصل ويرجع تانى لعقله

بالضبط زى واحد يعمل حادثة جامدة بالعربية .. بتحصله حالة من اللاوعي وبينسى اللى حصل .. وبعد ما الامور تستقر بفترة ( قد تكون دقيقة واحدة فقط ) يرجع تانى يفهم الى حصل ويرجع لطبيعته

والشاب ده اول ما دبح مراته وفصل رأسها عن جسمها ( حسب ما الشيخ قاله وفهمه انه كده هيرتاح ) جاتله حالة هيستيرية فكان فدبح خطيبته ( لان صعب حد يدبح خطيبته بالسهولة دى ) ولما شاف اختها بتصوت راح جابها هيا التانية .. وبعدها نزل الشارع يهلوس باى كلام ويشهر السكين فى وش اى واحد فى الشارع لحد لما تمكنوا منه .. ساعتها كان فى ايد الشرطة فحكى اللى قاله

4- الشاب ده انا اعرفه .. واعرف ناس تعرفه كويس جدا .. معرفتى بيه مش تعامل فى مكتبة وورق .. انما تعامل فى اعتكاف وصلاة قيام . وافطار فى رمضان .. كل اللى يعرفوه بيقولوا انه كان شاب فى قمة الالتزام والاخلاق .. مفيش اعتكاف فى رمضان بيفوته .. ويعنى زى ما بنقول .. واحد كويس ميطلعش منه كده
لكن للاسف ... قصة الجن واللبس .. والسحر والعمل السفلى .. والخرافات والغباء المسيطر على الناس .. والانقح منه اللى اقنعه بان الحل فى قتل حماته .. هو ده اللى المفروض يتحارب

احنا كمجتمع للاسف من كتر الاحباط والهم اللى عايشينه .. بقينا عايزين اى حاجة نعلق عليها فشلنا .. ولازم تكون حاجة غيبية غير ملموسة
فتلاقى الفاشل فى شغله يقول اعمل ايه بس .. انا اتحسدت
وتلاقى الفاشل فى علاقاته الاجتماعية يقول .. انا معمول لى عمل
وتسمع المبررات على طول الخط .. اصل لو كان .. اصل انا .. اصل انت مش فاهم .. ده انا كنت عايز اروح يمين بس جت شمال
اصل وفصل .. انا كنت فاكر .. انا كنت بفكر ان انت عايز كذا كذا

وتلاقى سلسلة التبرير اشتغلت .. وتلاقى الشماعات جاهزة .. وده سببه الاحباط المستمر والفشل الدائم للناس

مفيش حد حاسس انه عمل انجاز .. او انه فعلا حقق حاجة فى حياته افادت الاخرين ( ولذلك الحاجات دى والكلام ده ينتشر فقط بين الطبقات الدنيا .. مش فى المثقفين او بين الاغنياء )


اما بالنسبة للموضوع ككل بقه .. ففى الغالب هو هياخد اعدام بالثلاثة .. لان المشكلة ان القاضى اللى هيحكم هيبقى قدامه قضية رأي عام ... مش حادثة قتل عادية زى اى حادثة

ولانها حادثة فريدة من نوعها يرفضها المجتمع لبشاعتها .. وقد يخفف الحكم انها مرتبطة بقضية تهم المجتمع بالدرجة الاولى وهى قضية الزواج وارتفاع تكاليفه .. دى بس اللى ممكن تشفعله وتخفف الحكم من اعدام ثلاث مرات الى مرتين ولا حاجة

الخلاصة .. مينفعش نصدق الكلام بتاع العمل والسحر والجن المتلبس فى واحد .. ده كله كلام اهبل وتخلف احنا بنقنع نفسنا بيه علشان نبرر بيه فشلنا وتخلفنا
وانا عايز اسأل سؤال لكل المؤمنين بيه .. ليه محدش بيعمل كده فى بوش مثلا ؟؟ طيب عايزين حد يعمل عمل فى اليهود ويسحر ابوهم ويطلعهم بره

او يلبس بوش فى عفريت ازرق ياخده ونخلص منه ؟؟ او اى حد تانى

لكن المشكلة ان الكلام ده مش موجود الا عندنا احنا بس

ربنا يهدينا جميعا

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

يارب صبرنا

مرسى يا سنبله على الاخبار
وفعلا لااااااااااااااااااااااااااااااااااااااازم نشيل من دماغنا الحاجات المتخلفه دى
اللى هى زى السحر والاعمال وكل ده
ولازم كل واحد يرمى حموله على الله ويقف من نفسه
ونقول الحمدلله فى السراء والضراء مش فى السراء نقول الحمدلله والضراء نقول ده معمولنا عمل ده كله كلام متخلف ده بيبقى ابتلاء من ربنا وتغفير زنوب فلازم نقول الحمدلله فى السراء والضراء
وربنا يهدينا ويرحمنا اجمعين فى ظل الظروف دى

شكرا يا سنبلة



والحمد لله انا بدأت انسي المنظر



علي فكرة


المنظر فضل معلق معايا حتي الان

ولما بفتكره بتنيل


وانا عيشت كام يوم ماليش نفس اكل

والعملية كانت بايظة مني شوية


الحمد لله

لا حول و لا قوة الا بالله

للدرجادى الجهل سيطر عليه حوله من انسان ملتزم لقاتل و مش اى قاتل




انا مرة سمعت فى التلفزيون ان فعلا الدجالين دول كتير جدا و مش عارفه البحيرة فيها مدينه فيها لوحدها 100 دجال !!

الناس اللى بتصدقهم دول بجد مش عارفه الواحد يشفق عليهم و لا يكرههم

هما جهله جدا اكيد

الناس دى لو اتعلمت و فهمت دينها صح هتعرف ان مفيش شىء و لا ضر هيحصلله الا لو ربنا كاتبله دة
و فعلا السحر موجود بس الساحر اللى بجد دة شىء نادر نلاقيه و كان السحر منتشر زمان عند اليهود و عشان كدة كانت معجزة سيدنا موسى تفوق سحرهم

و ساعتها فاكره فعلا قالوا المثل بتاع ما دام هما جامدين كدة ما يعملوا عمل لاعداءنا و يريحونا منهم

و اساسا الساحر بيبقى كافر دة اللى اعرفه فمنين هو شيخ و ساحر

اعوذ بالله

ربنا يهديهم
بس احنا لازم يكون لينا دور و نوعي الناس الجهله دى

الناس دى مش عايزين محو اميه قراءة وكتابه
الناس دى عايزة محو لجهلهم بدينهم

ذى تلاقى واحد خايف من الحسد فيكدب و لا يعلق حاجات غريبه كدة و لا يقولك خمسه و حاجات بجد متخلفه
مع انه لو يقرا المعوذتين ربنا هيحفظه من كل سوء

الناس دى محتاجة تعرف ان الحسد موجود و السحر بيحصل فعلا و دة مذكور فى القران و كلنا عارفينه
لكن مش الحاجات اللى بيعملوها و لا اللى بتحصل دى هى اللى سحر و لا اللى بيعملوه دة علاج للحسد و السحر

عفوا


هناك سحر وهناك اشياء صحيحة

و انا ققلت ان فى شىء اسمه السحر لكن مش كل واحد قاعد عامل فيها ساحر يبقى ساحر

دى صعبه اوى و الساحر الاصلى حسب معلوماتى عشان يقدر يتعامل مع جنى لازم استغفر الله العظيم يعبده

و السحر شىء نادر جدا فى زمننا دة بس فى سحرة فعلا و اسمع عن واحد اسمه ديفيد حاجة كدة دة ساحر بجد

انا ما قولتش انك ما قولتيش ما فيش سحر


بس انا بقول ان فيه سحر


بس فيه انواع وطرق للسحر

ومش لازم يعبد جن علشان يعمل كده


فيه ناس ربنا بيجعلهم يسخروا جن في خدمتهم

وفي ناس بتعمل عمايل سودة علشان تسخر الجن الكافر في خدمته وده تقريبا اسمه السحر الاسود


وفيه ناس الجن بتتصل بيهم بطرق عديدة وبيبقوا معاهم


المهم في الجن والسحر وما الي ذلك هو


كيفية تسخير الجن في الخير وليس في الشر


ده طبعا بعيدا عن السحر الاسود

لاحول ولا قوة الا بالله

ربنا يرحمهم ويغفر ليهم ويتوب عنهم يارب
ويارب يدخلو الجنه يارب
وربنا يرحهم
ويارب يكون الشخص ده عبرة لاي حد
ويهديه ويتوب عنه هوا كمان


وحسبي الله ونعم الوكيل يااااااااااارب يا رب انت حسبي وربي

والحمد الله الذي عافانا مما ابتلي به غيرنا وفضلنا علي كتير من خقه تفضيلا

الحمد الله

وربنا معاك يا هشام باللي شفته
ده انا شفت واحده ساعات الحادثه اللي حصلتلي
منخيرها اتكسرت ومش قادره انسي شكلها
ما بالك انت

ربنا معاك بجد