ربنا ييكرمك يا حبيبتى
و عادى براحتك دة نصايحك دى حاجة جمييله و تاخدى اتى كمان عليها ثواب
و ما دام يا ست نفسك تبقى كدة ما تعملليلنا موضوع ذى بتاع بوسي كدة اللى فى ساحة البنات
و تساعدينا ربنا يكرمك
اما علم النفس انا مخدتوش بس اعتقد لذيذ
ممكن افيدك فى الفيلوسوفى ..محبة الحكمة
اشرحلك مربع ارسطوا على السريع كدة
ة عليه 5 درجات و سؤال مضمون و يعتبر عملى الفلسفه
هو و سؤال الاستقراء و على التنين سوا 10 درجات
الاستقرا ء سهل اوى
مثلا اقولك اعضاء كوميرس 2009 طيبين
و ندى عضوة فى كوميرس 2009
_______________________
اذاً ندى طيبة
شفت عبيطة اذاى المساله دى و عليها 5 درجات
بس الفكرة انه بيقولك هات قضيه كليه او جزئيه - سالبه او موجبه
الكليه .. ذى اسمها شىء كلى بقول حكم عام على شيء باكمله ..ذى اقول كل الطلبه كويسن
اما الجزئية بقول حكم على جزء من الكل .. ذى اقول بعض الطلبه كويسين ..
و كل من الجزئية و الكليه ممكن تكون سالبه او موجبه
موجبه يعنى بقول صفة ذى ما تقول مثبته ..يعنى طيب - شرير - حلو - مؤدب - ملتزم .....
اما السالبة منفيه .. مش مؤدبين - مش حلوين - مش كويسين
و هكذا
و بتبقى ف شوية قواعد ان لو القضيه نوعها ايه مع نوعها ايه تكون النتيجة ايه و كدة
و مربع ارسطو نفس الفكرة تقريبا بس بتعمله فى شكل مربع جواه حرف اكس .. ما علينا هتبقى تشوفه بقى
و بعد ما يفضلو يعلموك فى الكلام دة ييجوا فى اخر المنهج و يقولولك انه استقراء ارسطو عقيم - مجدب- لا يؤدي الى جديد
هى الفكرة كلها انك بتدرسه عشان تتعلم اذاى تفكر باسلوب منطقى
انك بتطلع النتايج من خلال انك بتعمل قياس لشىء على شىء او بتعمل استقراء ذى اللى قلتلك عليه
فبيعلمك اذاى تفكر باسلوب منطقي يعنى مينفعش تبقى عارف ان كومرس 2009 طيبين و تيجى تقول ان انت و انت عضو فيه انك شرير
هي دى الفكرة
فالمنطق لذيذ بيعودك تفك باسلوب منطقى
اما الفلسفه فجزئها انا كنت بموووت فيه بتاخد فيه على ما اتذكر شوية اراء للفلاسفه ف مواضيع كتير
و بتاخد انواع التفكير ان فى ناس تفسيرها للاشياء ديني و ناس علمى و ناس خرافى و دة ممكن يبقى لظاهرة واحدة
ذى ان الرعد و البرق
الديني .. يقول سبحان الله دة من عجائب قدرة ربنا و دليل على وجوده
اللى تفكيره باسلوب علمى و بس .. يقول دة نتيجة ان السحاب باين خبط فى بعضه حاجة ذى كدة دة الرعد و البرق شحنا سابله مع موجبه و كلام من دة يعنى .. مش فاكرة التفسير اوى
الخرافى .. يقولك دة العفاريت كانوا بيلعبوا سوسه كف عروسه فوق
كدة يعنى
و برضه بقى اراء الفلاسفه ذى ما قلتلك فى حاجات كتير من الحاجات اللى بحبها كان راي الامام محمد عبده فى معنى القضاء و القدر و ان معناه اسبقية العلم الالهى باللى هنعمله
و ان التوكل مش معناه ننام و نقول متوكلين لكن ناخد بكل الاسباب و نتوكل على ربنا و ربنا بيرزقنا
و كان فى برضه اراءهم حول ايه السبب فى ان الواحد ما يغلطش
تقريبا كان دى اراءهم
فى اللى قال عشان يرضي ربنا
فى اللى قال دة راجع لانه خايف من المجتمع و الناس
فى اللى قال عشان خايف يدخل النار
فى واحد اسمه شافت سبري قال ان الانسان عنده حاجة اسمها الحاسه الخلقيه و هى دى الحاسة السادسه و اللى بتخليه يحس ان الحاجة غلط فميعملهاش .( الضمير يعنى و الفطرة )
و اراء كدة
و فى الاخر بتلاقى ان كل اسبابهم صح تقريا و ممكن كلها تؤدي لان الواحد مبيعملش الغلط بسببها
و برضه بتاخد فى ناس كتير اذاى وصل لانه بقى موحد بالله سبحانه و تعالى
و هتاخد قصة الامام الغزالى حجة الاسلام
و هتاخد ديكارت اللى قال
انا اشك اذا انا افكر
و انا افكر اذا انا موجود
و انا موجود اذا هناك من اوجدنى
و اذا الله موجود و خالق
مش فاكرة اخر سطرين كان قالهم اذاى بالظبط بس تقريبا كدة
و هتاخد اهمية الفلسفه و حاجات كتيير بقى بس ظريفه و برضه مادة خمسينات
و هتدفعلى كام بقى فى الحصة دى
ربنا يوفقك و يكرمك .. و فكر فى الاقتصاد و احصاء لو بتحب الرياضه
سلااااااام عليييكم و رحمة الله و بركاته