الهجره غير الشرعيه - موضوع للنقاش -

لو بعد الشر إتأخر موضوع الشغل ده ههههههههههههههههههه
حلوه اوى الكلمه دى فطستنى من الضحك حلو اوى ان الواحد يكون متفائل بس مش حلو انه يبقى عايش فى غيبوبه ، بيتهيائلى لو الموضوع سهل مكنتش حد غلب
ارجع واقولك احنا غيرهم وبالرغم ان كل الشباب قبلينا قالوا كده بس برضه احنا غيرهم وده بتوفيق من ربنا
تعرف انا شركه فودافون هتبوس رجلى علشان اروحلهم بس انا بفكر اروح اتصالات علشان مرتباتهم اعلى او يمكن افتح شركه لوحدى لتخريط البصل واسمييها بصلكوا
نتكلم بجد شويه الموضوع فعلا مهم جدا وبالذات للناس اللى ظروفها مش مسعداها ( يعنى الشباب كلهم فى العهد الجديد لرئيس البلديه ) واعمل اللى عليك بزياده اوى فوق طاقتك وان شاء الله احتمال 30% تقدر تشتغل او نجيب حد يشتغلك

acc mak كتب:

لو بعد الشر إتأخر موضوع الشغل ده ههههههههههههههههههه
حلوه اوى الكلمه دى فطستنى من الضحك حلو اوى ان الواحد يكون متفائل بس مش حلو انه يبقى عايش فى غيبوبه ، بيتهيائلى لو الموضوع سهل مكنتش حد غلب

ليه يا بني كده إيه غيبوبه دي متبقاش متشائم والله يابني في شغل في مصر بس هو موضوع مؤهلات
الناس اللي إنت شايفهم وبيقولوا إحنا مبنتغلش معندهمش المؤهلات إنهم يشتغلوا لأن دلوقتي المشكله بقت فينا إحنا
الناس بتتخرج يادوب الشهاده وعايزين يشتغلوا طيب واللي مموت نفسه وواخد كورسات وبيشتغل في الأجازه عشان يزود خبراته يقعد في البيت بعد لما يتخرج والتاني اللي كان مقضيها في الأجازه ومش مهتم بالكورسات ولا بأي حاجه يشتغل؟!!!!

ارجع واقولك احنا غيرهم وبالرغم ان كل الشباب قبلينا قالوا كده بس برضه احنا غيرهم وده بتوفيق من ربنا
تعرف انا شركه فودافون هتبوس رجلى علشان اروحلهم بس انا بفكر اروح اتصالات علشان مرتباتهم اعلى او يمكن افتح شركه لوحدى لتخريط البصل واسمييها بصلكوا

ههههههههه ماشي يا سيدي هتشتغل فردي يعني

نتكلم بجد شويه الموضوع فعلا مهم جدا وبالذات للناس اللى ظروفها مش مسعداها ( يعنى الشباب كلهم فى العهد الجديد لرئيس البلديه ) واعمل اللى عليك بزياده اوى فوق طاقتك وان شاء الله احتمال 30% تقدر تشتغل او نجيب حد يشتغلك

تؤتؤ لكل مجتهد نصيب
ومستني باقي أرائكم

تعرف انك نكدت عليا بالكلمتين دول لان كلامك صح مليون الميه
الواحد زمااااااااااااااان كان بيعمل كورسات وكنت بنزل شغل فى شركات لكن من اول مادخلت سنه تالته وانا فى النازل ده مش معناه انى منفض بس بيبقى ورايا حاجات عائليه شاغله وقتى كله ومش قادر افوق لنفسى
كفايه بقى علشان عايز اعيط شويه

خلاص متزعلش والله أنا مش بكلم عنك إنت يعني أنا بقول على المشكله عموما
الله يكون في عونك في الظروف اللي عندك ومش بقولك يعني إننا مقطعين السمكه بس الواحد بيعمل اللي عليه وبيحاول يزود خبراته ويتقف نفسه
ومستني أراء باقي الأعضاء

الموضوع ده فكرته قديمه

ودلوقتي اللي بيهاجر هجرة غير شرعية ده يبقى غبي

وكمان ده ضد أخلاق المسلمين

ومش هيفيد الكلام في الموضوع ده

مصطفى كتب:

الموضوع ده فكرته قديمه

ودلوقتي اللي بيهاجر هجرة غير شرعية ده يبقى غبي

وكمان ده ضد أخلاق المسلمين

ومش هيفيد الكلام في الموضوع ده

أنا مش هرد عليك يا مصطفى

اولا فعلا ذى ما قلت (لكل مجتهد نصيب )
و كمان من جد وجد

و انا فى رايي ان الهجرة دى وحشه شرعيه و لا مش شرعيه

لان بلدنا محتاجالنا

لو مشتغلناش فيها و سبناها كلنا هتلاقي مين يعمرها

دة بالنسبه للهجرة عموما بالذات اللى هى بمعنى كلمه هجرة يعني طول العمر ..ممكن لو سنة و لا حاجة مش مشكله اوى


اما بقى الهجرة غير الشرعيه فبجد لو فكروا كويس هيلاقوا ان تفكيرهم غلط

لانه اول حاجة طبعا طريقة السفر غير الادميه و اللى بتؤدي ان كتير منهم يغرقوا و هما لسه فى بدايه حياتهم دة اكنهم بيرموا نفسهم للتهلكة

تانى حاجة

هو لو سافر اما هيتقبض عليه ذى ما انت ما قلت

او هيفلت منهم وهيشتغل بقى

يا ترى هيشتغل ايه ؟؟

اكيد شغلانه مش كويسه ...هيغسل اطباق و لا يكنس الشوارع و لا يشحت و لا ..... معتقدش حد بيروح هناك يعيش بكرامته ابدا

فمادام هيشتغل وحش ما و الله مصر مليانه حاجات من دي كتير
ذى الاعلان بتاع الحق قبل القطر ما يفوتك

و يشتغل شغلانه اى كلام و يكبر شوية شويه و يفضل بكرامته وسط اهله

انما يذل نفسه قدام اللى مش من اهله ليه

انا بجد مش قادرة افهم موقفهم

هل حد عمل كدة واتبسط و حس انه عاش بكرامه و سعادة

و ممكن لما يفقد كرامته يضيع نفسه و دينه و يبقى ضاع تماما

انا حاسه انها كلها مشاكل و مش فاهمه بيفكروا ليه كدة

و البلد فيه شغل كتير للى عنده مؤهل و اللى معندوش ليه كتير بس ممكن مش مستواه حلو

بس لو كلنا فكرنا و بدانا واحدة واحدة و محدش بيعلى مرة واحدة و يبقى مليونير من يوم

ذى ما هيشقى برة يشقى فى بلده و ينفعها احسن

و لو كلامي غلط قولولي يمكن اكون معنديش خبرة برضه

سلااام علييكم و رحمة الله و بركاته

و اه كمان لازم كلنا نشد حيلنا اوى اوى بقى عشان فعلا بعد الشر ميحصلش لاى حد فينا انه يفكر اصلا فى حاجة ذى دى

و بالذات الولاد يعني ..معتقدش فى بنات بتعمل كدة

و كمان الولاد الشغل اساسي ليهم يبقى ىلازم تشدوا حيلكوا اوى اوى اوى جامد

و ربنا يوفقكوا كلكوا و ان شاء الله مصر تبقى حلوة على اديكوا و ادينا كلنا و يبقى فيها فرص شغل كتييير و مفيش مصري تاني بيفكر يعمل فى نفسه كدة و يرمي نفسه فى الهجرة

انا متفق مع كتيييييييير من كلامك يا flowers tear بس لو الواحد لقى فرصه بره احسن وبطرق صحيحه وميه فى الميه بيتهيالى مش هيغنى اغنيه لا يامصرى لا ولا لا والف لا
مفيش حد ساذج اليومين دووووول
ومحدش يزعل منى اكيد كلنا بنبصلها من ناحيه ماديه اكتر علشان حياه كريمه احنا مابنتقدرش لا فى بلدنا ولا بره واكيد كتير مننا بيفكر فى نفسه
لسه بدرى على صلاح الدين القليوبى

اكيد طبعا الهجرة الغير شرعية بقت حاجة صعيه جدا بتهدد كل الدول على فكرة

وحاصة الدول النامية واللى احنا منها

وفعلا كل واحد لو لقى فرصة يهاجر بطريقة سليمة هايمشى طالما ده هايفيده ماديا

ودلوقتى الماس عايزة تعبش وطبعا فيه ناس بتستغل ده وتهرب الناس وتاخد فلوسهم وفيهم ناس بتموت علشان مش فاهمين

وكلام مصطفى غريب

يعنى انت ولا عندك رأى ولا قولت حاجة

وداخل ترخم وخلاص

انسان غريب

موضوع جميل جدا يا صبرى

تسلم ايدك

ليه يا جماعه و بلدنا ملهاش حق علينا

لو كلنا سبناها هتلاقي مييييييييييييييييييييييييييييييييييييييين

انا ضد الهجرة

لو هتسافروا بالكتير سنتين تلاته مش مشكلة

لكن هجرة !!

و كمان معقوله تقدروا تسيبوا بلدكوا طوووول العمر

و كمان ان شاء الله صلاح الدين ييجي قريب ذيه تانى كتييييير

عقبال ما يجيى صلاح الدين

انا هسافر

ههههههههههههههه

و ليه متكونش ذيه

لسه ماشتريتش الحصان

ههههههههههههههههههههههههههههههه

انا بفرح جدا بكلامك يا ندى وبحس ان الدنيا لسه بخير

لكن فة نفس الوقت زعلان لانك متفائلة زيادة على الزوم

اه صح عندك حق تفاؤل زيادة شوية ..بس ايه المانع

يعني اكيد اللى هيسعى لانه يكون صلاح الدين هيوصل فى يوم لانه يبقى ذى جندى من جنود جيش صلاح الدين
او هيكون انسان ناجح ف مجاله

المجتمع ذى ما كلنا عارفين متكون من اجزاااء كتييييير لو كلها صلحت هيصلح المجتمع كله

لو كلنا كل واحد ادى عمله بضمير و كويس و اجتهد على قدددد ما يقدر و ابتكر فى شغله

هينجح المجتمع ككل

يعني اللى بيكنسوا الشوارع لو هما بيعملوا شغلهم بضمير بدل ما بيشحتوا ومبيشتغلوش ( يشتغل و بعدين يشحت مفهاش حاجة عنده حق مرتبه ل يمكن يكفيه ..لكن مبيشتغلوش اصلا و الشوارع بقت ميتبصلهاش )

و لو افترضنا انه الى جانب شغله ما اداه بضمير راح استثمر فى الفلوس اللى شحتها و اشترى شوية زرع كدة و باعه للناس و الناس حطت ف بلكوناتها زرع

و يبقى بكدة ابتكر فى مجاله ( تنظيف و تجميل الشوارع )

و هو هيكسب و هيزود فلوسه لما يشتري و يبيع الى جانب الكنس

و مش بعيد يبقى غني و يمشى يكنس و هو لابس شيك و بمكنسه بالكهربه بدل المقشه

شفتوا الحياه حلوة ازاااى

احنا بس نتوكل على الله و نعمل اللى علينا و نجتهد و نبتكر و كلللللله هيبقى تمااام ان شاء الله

سلاااام عليييكم و رحمة الله و بركاته

انتى مش مقتنعة ليه ان احنا كده

ده حالنا ومفيش تغيير صدقينى

انا مثلا عايز اعمل حاجة بحاول بكل الطرق وبتعب كتير علشان اوصلها

والحمد لله وبفضله عز وجل بيكرمنى بيها

وفى نفس الوقت ناس بتوصل للحاجة ديه بدون اى تعب

اكيد ربنا بيكرم اللى بيتعب ونيته صافية له

بس حال الكبار بقى صعب وكله مش عايز حد يطلع عليه

هى ديه المشكلة

وده موجود وصدقينى مش هايتغير خالص فى مصر

لانه بقى عادة وسبب للحياة فى البلد ديه

طب هيحصل ايه لو سبنانا من السلبيات و حاولنا مع نفسنا و هنوصل للى عايزينه ان شاء الله ذى الراجل اللى بيكنس الشارع اللى قلت عليه

الانسان اللى عايز يوصل لهدفه بيبص للايجابيات و يستفيد منها اقصى استفادة
و يحاول يغير السلبيات ..معرفش يغيرها يتفاداها

و يركز على الايجابيات و يتوكل على الله و يعمل اللى عليه

لو كلنا عملنا كدة هنتقدم

لكن لو فضلنا فى الهموم و المشاكل مش هنخللللللص و هنقف فى مكاننا و ممش هنتحرك

لزمتها ايه بقى نوقف نفسنا

شكرا يا جماعه الموضوع نور بيكوا
والواحد يا ندى فعلا بيحاول يفتكر دايما الإيجابيات اللي بتحصل عشان السلبيات متتراكمش عليه
كلام بروف هو اللي بقصده من الموضوع
أنا عايز أقول إن ما شاء الله في شباب وكتير كمان رغم إنهم عارفين إنا للي بيعملوه هنا في مصر لو تعبوه في الإمارات مثلا هياخدوا عائد أكتر ومش هيبقى فيه حكاية إن واحد ميتعبش ويوصل لنفس النتيجه يعني هيبقى فيه تكافؤ فرص أكتر وإحساس بالعداله أكتر لكن رغم كده الشباب بيقولوا
لأ إحنا مش هنيأس ومش معنى إن بره أحسن إن إحنا هنخرج ونسيب بلدنا لأ إحنا هنفضل نحاول وزي ما مصطفى بيقول ربنا بيبارك في شغل الواحد لما بيبقى تعبان وإجتهد عشان يعمله

لكن للأسف مش كل الشباب تفكيرهم كده ومقصدش فئة الشباب اللي زي ماك وبيقولوا نسافر لو فيها عائد أفضل لأنه هيبقى ساعتها تعب ودور هنا وعرف إن هناك ممكن يكون أفضل ماديا
أنا أقصد الشباب اللي مش بيدور هنا ويتعب أصلا ده على طول بيستلف المبلغ وعلى أقرب مكتب للسفر ويقوم رامي فلوسه في طريق هلاكه ولا كلف نفسه يتعب ويدور ولا يجتهد أصلا

كلام تمام تمام تمام يا صبرى

الشاب المصرى بقى بيشيل الهم من بدرى

ده غلط على صحته وعلى شغله وعلى حاجات كتير

وده كله بسبب الظروف

ومين يا ندى اللى هايعمل اللى انتى بتقولى عليه

كلامك اصبح نادرا جدا فى هذا الزمان

عن أبي ثَعْلَبَةَ الْخُشَنِيَّ : عن النبي صلى الله عليه وسلم أنه قال : " إِنَّ مِنْ وَرَائِكُمْ أَيَّامَ الصَّبْرِ الصَّبْرُ فِيهِ مِثْلُ قَبْضٍ عَلَى الْجَمْرِ لِلْعَامِلِ فِيهِمْ مِثْلُ أَجْرِ خَمْسِينَ رَجُلا يَعْمَلُونَ مِثْلَ عَمَلِهِ قَالَ يَا رَسُولَ اللَّهِ أَجْرُ خَمْسِينَ مِنْهُمْ قَالَ أَجْرُ خَمْسِينَ مِنْكُمْ . " أخرجه أبوداود وابن ماجه وصححه الألباني في الصحيحة بشواهده


لو افترضنا ان ايامنا هى ايام الصبر اللى فيها اللي يصبر كانه بيقبض على جمر
فشوف بقى اجر 50 صحابي

بيتهيالى محمد وضح وجهه نظرى بصورة افضل انا مقلتش ان الواحد يكون تفكيره من البدايه انه يسافر انا قولت لو فى فرصه افضل وبعدين انا اصغر اخواتى واخواتى اشتغلوا جوه البلد ماعملوش حاجه لما سفروا عرفوا يتجوزوا ويفتحوا بيت مش معنى كده انا الواحد بيروح هناك بيبقى من الاغنياء لكن يكفى انه يعيش حياه كريمه واذا كانت المعامله بره وحشه فهى اكيد هتكون احسن من مصر
طيب تدونى فرصه احكيلكوا حكايه من واحد قريبى مسافر لسه قايلهالى قبل مااقعد معاكوا
قريبى ده مسافر فى السعوديه وكنت بتكلم معاه عن الحياه هناك هو كان فى مصر كان بيشتغل شغلانتين فى اليوم كان شغال فى جامعه حلوان وبعد الظهر شغال فى الحزب الوطنى
طبعا اللى يسمع كده يقول ياما هنا ياما هناك ده واحد شغال فى الجامعه وبليل فى الحزب بس احب اوضح انه كان بيطلع موصلاته بالعافيه
لما سافر السعوديه بيقولى لما بتحصل حركه انتقلات لاى حد هناك الشغل بتاعه بيعمله حجز فى طياره وينزله فى فندق ويديله بدل طعام ولو هينقل نهائى بينقلوا له العفش بتاعه
تفتكر لو حصل ده معاك فى مصر هتسيبها؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كل الناس بتقولى انت تخلص بقى وتسافر على طوووول وانا اقلهم لا انا عايز اجرب هنا الاول نفسى اقعد فيها بس انا عارف النتيجه هتعب ومش هستحمل وفى الاخر هسافر برضه
انا عايز اقول ان الامثله ادامنا كتير يبقى لازم الواحد يتعلم من اخطاء غيره ولازم توجه نفسك صح
وعلشان متفهمش غلط انا مش بقول سافر على طول بس اللى قبلينا حصلهم كده
ماهى حاجه بالعقل هتشتغل هنا بمجهود معين هتاخد جنيه هتشتغل هناك بنفس المجهود هتاخد اكتر من جنيه وانت لازم تحسبها صح وتعرف هتجيب همها ولا لا دى غربه مش حاجه سهله
وكلمه اخيرة ليكى ياندى كلامك فوق الممتاز بس اعذرينى لما اقولك انتى بنت يعنى كلامك يبقى تحفيز انما انه يطبق ماافتكرش وياريت متزعليش منى انا اسف
وفى الاول والاخر ادينا صابرين وياما اكتر من كده وربنا بيفرج

على فكرة انا دلوقتي مش فى مصر للاسفففف لان بابا مسافر من سنة السعودية و هينزل السنة دى ان شاء الله

يعني عارفه اللى بيحصل فى السعوديه

هما صح مديين لكل اللى بيشتغل معاهم عربيه و لاب توب و بيدفعولهم بنزين العربيه و فاتورة الموبايل غير ان طبعا مفيش مقارنه بين مرتبات هنا و مصر

فلو انت نفسك تسافر سنتين كدة مفهاش حاجة و تعمل مبلغ كويس تنزل تعمل بيه مشروع و لا حاجة ليك ف مصر

لكن تسافر طول عمرك و تهاجر تبقى مش بتفكر الا فى نفسك

يعني ببساطة الناس لما بتيجي هنا منهم اللى بيكون المبلغ اللى محتاجله عشان يقدر يكون نفسه او يعمل لنفسه مشروع او حتى ذى بابا ما جه هنا و هو خلاص عندة 3 ولاد كبار بس عشان عايز يجيب لاخواتي شقق لما يتجوزواو يبقى ساعدهم شوية

فلو هتيجي عايز هدف محدد مبلغ معين و بس و ترجع مش دة اللى برفضه مع انه حاجة وحشه جدا و بيتعبوا فى شغلهم و برضه على فكرة فى واسطه و مصالح و مقالب و كل الكلام دة فى الشغل برضه


بس اللى انا برفضه ان اغلب اللى بييجي بالذات و هو صغير بياخد على القعدة و يستحلى الفلوس و يتحول سفره لهجرة و يفضل يشيل و يحط فى فلوس على بعضها

بس هيعمل بيها ايه هىالفلوس دى بيجمعوها ليه مش عشان يتبسطوا او يعيشوا فى راحه

راحة ايه فى بعدك عن اهلك و بلدك

و لا كمان لو دوله مش عربيه
يعني السعوديه باجماع كل اللى سافروا احسن بلد تسافرها عشان على لااقل تقدر تمشى فيها و انت محافظ على دينك كويس و يمكن تتحسن لو روحت حجيت و عملت عمرة كمان

لكن الدول التانيه بالذات لو دوله مش عربيه هتبىق حتى مش لاقى الى يفهمك و تكلمه و تفضفضله يوم ما تبقى مخنوق

احنا بشر مش اله بتشتغل

صح ظروف بلدنا صعبه و مرتباتها قليله بس مش لازم نبقى طماعين

الناس تحاول فى بلدها و لو لقت فرصه معقوله يقدر يعيش بيها حياه متوسطه يحمد ربنا و يعيش فيها

و لو ملقاش خالص يسافر يكون مبلغ و يرجع بيه

لكن السفر طول العمر انا مش شايفاله منطق الا حب المال

و انا عارفه انى بنت طبعا و مش هقدر احس باللى انتوا فيه و حتى لما بكلم بابا دايما يقولى انتى مش حاسه بالمسئولية

انا صح يمكن اكون مش مقدرة و مش شايفه بس اللى مجرباه ان الغربه دى ان شاء الله فيها فلوس الدنيا كلها مش هتسوى حاجة جنب الحياة و سط اهل بلدك فى امن و حب و سلام و راحة و اطمئنان

مش حاسس انك وحيد و فى غربه وكل اللى حواليك مش عارفهم
و غير اهل مصر كمان جوها الجميل و نيلها ( دة هنا بيشتروا المياه عشان يشربوا و الميا بتاعت الحنفيه متبقاش طايق تتوضا بيها اصلا .طعمها وحش اوى ..دى نعمه اهه كبيرة محدش حاسس بيها ) و كل حاجة فى مصر جميله

مفيش حاجة تساوي العيشه فى مصر

عارفه انكوا هتقولولى العيشة محدش هيحس بيها لو معهوش فلوس

بس برد على الكلام دة بان الفلوس مهمه بس مش لازم تبقى كتيرلانها مش كل حاجة و مش كل حاجة تقدر تشتريها بالفلوس ..كفايه تبقى قادر تعيش عيشة بسيطة و استمتع بمميزات انك فى بلدك هتعيش اسعد من ما تبقى غني فى غير بلدك

و ربنا يوفقكواو تلاقوا شغل فى مصر حلو اول ما تتخرجوا و فعلا ذى ما قال محمد مجدى فى اول الموضوع خالص اللى بيبقى كويس و متفوق و مجتهد بيلاقى شغل كتير الحمد لله

و انا شفت ناس كتييير اوى اتخرجوا وا شتغلوا عادي يعني فان شاء الله تلاقوا شغل و حلو كمان و تبقوا مبسوطين بيه و فى بلدكوا حبيبتكم اجمل بلد فى الدنيا مصر

و لو سمحتوا اللى ميعجبوش كلامي اللى عارفه انه مبيعجبش حتى بابا ميتريقش عليا

معلش هو البنات كدة ..

و برضه مش كل البنات لحسن تيجي بنات تتخانق معايا

سلااام عليييكم و رحمة الله و بركاته

بس جمله اخيرة



مصر محتاجااااااااااااااالكم

ياريت متكونيش زعلتى منى انا مقصدش انى اتحامل عليكى بس كل الموضوع نسبه وتناسب واكيد كتير مننا عارف مصلحته فين وشىء طبيعى ان يكون فيه هناك مقالب وضرب من تحت الحزام ويمكن يكون اكتر من هنا علشان الغربه يكفيك لما تكون شاب ومسافر لوحدك بعيد عن اهلك هتعيش ازاى؟؟؟؟؟؟؟
ورغم انه مينفعش كلام فى السياسه الا خلينى اذكر نقطه صغيرة انه من اربع سنين قالها رئيس الوزراء مفيش شغل فى البلد واللى عايز يهاجر يهاجر ومحدش يمسك فى ديل الحكومه
اى دوله اجنبيه يبقى عندها زياده فى السكان يبقى بالنسبه ليها ثروة بشريه زى الصين مثلا انما لو اى دوله عربيه فيها زياده فى السكان بيبقى عبء جامد على الحكومه ياترى العيب فى مين؟؟؟؟؟؟
وعلشان متبقاش الحكومه هى شماعه الاخطاء واكيد فى جزء بيقع على الشعب
لكن ادينا بنحاول ومساله الرزق دى بتاعت ربنا وهو الوحيد اللى عارف الرزق فين
وبرافو عليك يامحمد اثرت موضوع حيوى جاد وبيهدد كل الشباب