أفضل طرق للمذاكرة

أفضل طرق للمذاكرة :



للمذاكرة طريقتان :


طريقة رئيسية ( طريقة الألوان والمسح الشامل )

طريقتان ابتكاريتان تكميليتان ( الكومودينو + جسر الحمار )


وهذه الطرق ليست بديلة لبعضها البعض ولكنها مكملة لبعضها البعض بهدف السيطرة الكاملة على المعلومات بمجهود أقل ووقت أيسر .



المسح الشامل 1 : عن طريق قراءة المحاضرة بالكامل كقراءة الجرنال بدون تركيز أو محاولة للحفظ – يعنى مثلا المحاضرة المكونة من 30 صفحة تقرأ فى 10 دقائق . والغرض من هذا الجزء من الطريقة احداث ألفة بين القارىء والأوراق وهذا فى غاية الأهمية من الناحية النفسية .


مرحلة التلوين : عن طريق تلوين العناوين الرئيسية والفرعية وتحت الفرعية والكلمات الهامة فى بعض الفقرات . وهذه المرحلة تعرف الطالب بالإطار العام للمحاضرة وتعطية شىء من السيطرة على المحاضرة وفى نفس الوقت تضاعف الألفة بينه وبين الأوراق . وهذه المرحلة تستغرق حوالى 10 دقائق أيضا .


مرحلة الإستيعاب السريع : فى هذه المرحلة يقرأ الطالب المحاضرة ببطء نسبيا ولكن ليس معنى هذا أن يقرأ الصفحة فى ساعة أو حتى نصف ساعة ولكن تقريبا 4- 7 دقائق تقريبا للصفحة ( بعيدا عن السرحان أو تخيل ماوراء السطور ولو وصل الأمر الى تأجيل فهم بعض النقاط حيث أنه بالتقدم فى المنهج يفك غموض الأجزاء القديمة المجملة ) .

المسح الشامل 2 : مثل الخطوة رقم 1 تماما .

5- بعد ذلك تترك المحاضرة تماما . وبعد 4- 5 أيام تعمل مسح سريع مرة أخرى فى 10 دقائق وتكرره كل





ملاحظات :




مدمنو الطريقة الكلاسيكية المستخدمة فى الثانوية العامة وهى طريقة " الحفظ التام أو الموت الزؤام " ومذاكرة الصفحة فى ساعة وعدم الإنتقال من الصفحة إلا بعد القضاء عليها حفظا - يظنون عدم جدوى طريقه التلوين والمسح الشامل ولكن يقول علماء النفس أن المعلومات التى يحصلها الإنسان ينساها خلال 10 أيام تقريبا حسب منحنى النسيان وهذا طبيعى عند كل البشر مهما كان مستوى حفظك لهذه المحاضرة .


ولكن طريقة التلوين والمسح الشامل توفر بقليل من المجهود والوقت الإحتفاظ بالمعلومة لوقت طويل جدا وتجديدها من خلال المسح الشامل وقد أثبتت الإحصائيات أن الطلاب والطالبات الذين يستعملون هذه الطريقة لا يقلون عن تقدير ممتاز خصوصا مع الكم الهائل من المعلومات الموجودة فى المحاضرات والمطلوب قراءتها كلها ليلة الإمتحان .


وحتى تغير طريقتك التقليدية الى هذه الطريقة لابد أن تتغير تدريجيا بتجربتها وتكرر وتصبر ولا تيأس حتى تتعود عليها وتصير أسلوب مذاكرة لديك .




طريقة الكومودينو :




تخصص هذه الطريقة التكميلية الإبتكارية للسيطرة على الرسومات ( مثل دورات الحياة فى علم الطفيليات ، وعلم الحيوان ورسومات النبات والعقاقير ورسومات التحليل الآلى والعقاقير التطبيقى مثل ال UV, IR ) وصور الأجهزة ( مثل أجهزة الصيدلانيات والصيدلة الصناعية والكروماتوجرافى فى العقاقير التطبيقى ) والصيغ الجزيئية للمركبات الكيميائية ( مثل الكيمياء العضوية والحيوية والفيتو والكيمياء الصيدلية ... الخ .





تتلخص هذه الطريقة فى إعداد مجموعة من الأوراق البيضاء ثم نرسم محتويات كل محاضرة من الصيغ الجزيئية للمركبات ( مثلا ) فى الورق ونضع كود لكل مركب وفى آخر ورقة نكتب مفتاح الحل ونضع هذا الورق على الكومودينو . وعند النوم بعد الإستعداد للنوم والإستلقاء فى وضع النوم ننظر نظرة عابرة فى الأوراق ونحاول التعرف على الصور ثم نراجع تخميننا بمفتاح الإجابة فى الورقة الأخيرة ثم بعد ذلك نروح فى ثبات عميق . ونكرر ذلك يوميا أو يوم بعد يوم . بعد عدة مرات تجد نفسك قد حفظت تلك الرسومات بشكل غير عادى .


ملحوظة : تعتمد هذه الطريقة على وقت ماقبل النوم حيث تكون الذاكرة والإستيعاب أعلى مايمكن ولو لم يتم بذل مجهود كبير فى التركيز كما يقول علماء النفس .




طريقة جسر الحمار :


تعالج هذه الطريقة ضعف حفظ العناصر الكثيرة عندما يطلب استظهارها[/size]


يعنى مثلا ما هى العوامل التى تؤثر على ظاهرة معينة ؟ وتكون الإجابة 25 نقطة – كيف تذكرها دون أن تغفل نقطة واحدة . ( مثل مادة الصيدلانيات والصحة العامة والصيدلة الصناعية والميكروبيولوجى والمعلومات الدوائية والعلاج الدوائى والفارماكولوجى والسموم )


تتلخص هذه الطريقة فى تحديد كلمات المفاتيح ( أى الكلمات المميزة ) فى كل عنصر . ثم أخذ الحرف الأول من كل كلمة من هذه الكلمات المفاتيح وتكوين جسر الحمار ( كلمة مميزة ذات معنى فكاهى أو مرتبطة بشىء مميز ) حيث يشير كل حرف لكلمة مفتاح وكل كلمة مفتاح توصل الى العنصر بكاملة .

اولا ..حلوة اوى الهوايه الجديدة دى ..حب استطلاع الحياه ..

و شكرا اوى على الموضوع دة

انا هقرا و ارد على جزئية جزئية فى السؤال ..معلش الامتحانات ماثرة


الطريقة الاولى

تمام كويس بس احنا هنذاكر امتى المادة عشرين مرة كدة

ممكن تركيز شوة بس طبعا مش لدرجة الحفظ لكن الفهم التام او الموت الزؤام مع استخدام الالوان اللى بتاثر جدا فعلا ..هتبقى المراجعه بعد كدة بسيطة و مجرد مراجعه العناوين دى ايام الامتحانات كله بيبقى تمام

التانيه ..هو انا مفهمتش اوى بس فعلا الرسومات حلوة و المراجعه السريعه قبل النوم بتفيييد اوى ..انا كنت قريت الملعلومه دى فى سنة اولى فى موضوع لمحمد 14 فى منتدى زمان و من ساعتها بطبقها غالبا و بتنفع الحمد لله اوى ..ربنا يكرمه انه عرفهالى ..و يكرمك على الموضوع دة طبعا و يكرم ياسو و لؤلؤة علشان اتعلمت منهم برضه حكاية الرسومات دى و انا فى تانيه
بجد المواضيع اللى عن المذاكرة دى بتفيد اوى اوى لان كلنا بنستفيد من خبرات بعض و انت اتعلمت منك حكاية ا لما نشغل فصين المخ افضل و الوعى الباطن بالتخيل و التانى بالمذاكرة و كدة دى(هو كان كلام كبير كدة بس دة معناه )و بتفيييد اوى

ربنا يكرمكوا كلكوا

و اما الطريقة التالته انا امبارح دخلت ابص بسرعه قريت اسمها اعدت اضحك ..بس طريقه لذيذة والله ..شكلى هتعلمها كدة و تبقى من ضمن الحاجات المؤثرة فى المذاكرة عندى ان شاء الله

لان فعلا ساعات حاجات بتبقى فى الكتب عاملينها كدة فمبننساهاش ..زى ال 4Ps فى التسويق كلنا عارفين من كدة انه المزيج التسويقي بيتكون من ايه
و برضه كان فى فىى البنوك بتاعه كدة معموله فى كلمه تريك فكنت عارفاها بسهوله

ان شاء الله ابقى احاول اطبقها

ربنا يكرمك على الموضوع دة ..جمييل جداا..

بجد يمكن انا مقتنعه ان كل انسان ليه اسلوب مذاكرة اللى ينفع معاه ..بس الواحد لما بيسمع طرق المذاكرة دى ساعات يكتشف ان فى حاجات تنفع معاه بس هو مش مكتشفها لسه
ففعلا بتفيد ...و حاجة زى الرسومات دى مثلا بجد غيرت مذاكرتى تماما ..يمكن لما جيت اطبقها طبقتها بانى مش رسومات بس لكن رسومات و شرح ثم شرح و ملخص ..و اعدت تدرج معايا لغايت يمكن بقت مش رسومات خالص ..[س بجد دى كانت البدايه انى جربت حاجة جديدة بعدين حولتها للى يناسبنى

فيا ريت كل واحد يحاول و يجرب عشان يتعلم بجد و يفهم ومحدش يستقل بقدراته ..كلنا عقولنا الحمد لله ربنا كرمنا بيها و مالهاش اخر فى التفكير و تخزين المعلومات بس احنا ندخلها صح و نحاول بجد و هنلاقى ربنا بيفتح علينا ..و ااى حد يقدر يكون شاطر و فاهم و حافظ كمان كل حاجة ..بس يحاول و يعسى بجدددد

و ربنا يوفقنا جميييعا

سلااااام عليييكم و رحمة الله و بركاته

اسفه للاطاله

هى الامتحانات برضه السبب

موضوع جميل يا جوهري
و في طرق ناس كتير بتحاول تشتغل بيها
بس زي ما قالت ندى كل واحد وليه طريقته
وزي ما الموضوع بيقول إن الطرق دي مكمله لبعض فلو واحد بيستخدم طريقه مش هيجرى حاجه واتسخدم التانيه معاها لأنها هتكملها يعني واحده للرسومات وواحده للنقاط الفرعيه الكتير وكده
ووالله يابني الطالب دلوقتي بيطبق معظم الكلام ده من غير ما يعرف طرق أو مش طرق بتلاقي صمود الواحد قدام الكم الهائل من المعلومات اللي ملطوبه منه بيخليه يبتكر طرق زي دي وطرق تانيه كمان
الله يكون في عوننا

طريقه جسر الحمار دى مهمه اوووى و ناجحه جدا كمان
و غالبا بتيجى بعد المسح الشامل و التلوين
بس مره واحده قبل الامتحان و مره فى الشهر اللى قبل الامتحانات

Mohamed magdy كتب:

موضوع جميل يا جوهري
و في طرق ناس كتير بتحاول تشتغل بيها
بس زي ما قالت ندى كل واحد وليه طريقته
وزي ما الموضوع بيقول إن الطرق دي مكمله لبعض فلو واحد بيستخدم طريقه مش هيجرى حاجه واتسخدم التانيه معاها لأنها هتكملها يعني واحده للرسومات وواحده للنقاط الفرعيه الكتير وكده
ووالله يابني الطالب دلوقتي بيطبق معظم الكلام ده من غير ما يعرف طرق أو مش طرق بتلاقي صمود الواحد قدام الكم الهائل من المعلومات اللي ملطوبه منه بيخليه يبتكر طرق زي دي وطرق تانيه كمان
الله يكون في عوننا

الحاجة ام الاختراع

الموضوع رائع وجميل جدا

ربنا يكرمك وينجحك

وبالنسبه لطريقه المسح الشامل دى

فصح جدا انها بتريح نفسيا وتعمل الفه

انا مابعرفش اذاكر غير لما اقرا كل اللى هذاكره مره واحده وبعدين اقسمه

وبالنسبه للالوان ف الاء دايما بتعملها وانا بالس عليها واقول انها بتضيع وقت

لانها بتلون المذكره كلها

ودايما المستر يقولى الون عنوانين المواضيع والكلمات المهمه

بس كنت بكسل بس بما انها مفيده كده هبقى اجربها فى الترمالتانى ان شاء الله

وربنا يكرمك على الموضوع

انتى عارفة يا فداء بجد اى حاجة ليها صورة او لون هتلاقيها معلقه فى مخك جدا ..حسب اللى سمعته ان الواحد بيفتكر الاشكال عموما و الالوان اكتر

يعني مثلا ممكن اقولك ان كتاب التاريخ فى الثانويه العامه كان لونه اصفر و الكتابه فيه من جوة اسود و العناوين لبنى
لكن مفتكرش المحتويات ايه اوى
و تلاقيكي دايما تفتكرى العناوين اللى بخط عريض عن الرغى اللى فى النص ..دة كله بيرجع لانها بتتخزن فى ذاكرتك الصورة و بمجرد ما تسمعى الحاجة عقلك بيستحضر الصورة المرتبطة بيها

فتلاقى نفسك فى الامتحان بتغشى من الصورة اللى فى مخك دى


و حاجة كمان بقى فى رايي بتدعم اكتر الصور ..الصووووووت ( لان عموما كل ما شغلتى حواسك كلها كل ما كان افضل فى الاستيعاب و التركيز و التخزين )

فحاولى تفتكرى مثلا صوت الدكتور و هو بيشرح (و دة اعتمادى الرئيسي للمذاكرة و عشان كدة بكتب المحاضرة بالعامية )
او انتى نفسك اشرحى لنفسك بصوت عالى فهتفتكرى صوتك و شرحك

انا برضه بعمل كدة بقعد اشرح للطلبه اللى مش موجودين و افهمهم و من اهم الطلبه بتوعى عروستى


و برضه من اللى بيدعم المذاكرة اوى النقاش فيها مع الغير

يعني انا ساعات ابقى بذاكر حاجة بصوت ييجى اخويا معدى و لا ماما و يسمعونى و يكلمونى فيها و مثلا نتلكلم اى كلام عن الحاجة دى بلاقيني منسيتهاش

و نرجع تانى للالوان

الالوان بتخلى الدنيا حلوة و منورة كدة بدل الابيض و اسود الكئيب فتخلى الواحد متفائل

انا متهيالى اهم حاجة للمذاكرة ان الواحد يظبط دماغه خالص كدة و يروقها و طبعا يتوكل على الله قبل كل شىء عشان يقدر يوصل للروقان دة .. و يذاكر مذاكرة ممتـــــــــعة مش مذاكرة ممله
يحبب نفسه فى المذاكرة فهيحبها و يستمتع بيها و يفهمها ان شاء الله
و يتفائل و يبقى طموووووح ..يذاكر بههدف انه هيفهم كل حاجة و هيقدر يستوعب المادة 100%
مش مذاكرة عشان دخول امتحان و كمان نجاح بس فيه ب 10 ..و اللى للاسف هو اسلوب ناس كتير اوى

ربنا يوفقنا كلنا و نحب المذاكرة

و اسفه على رغيي الكتير ..بس اصل دى من اهم اهتماماااتى .. يا رب تيجي بفايدة باذن الله و يا رب تبقى من اهتمامات ناس كتير مش مذاكرة للكليه بس لكن مذاكرة للتعلم لاى شىء مفيد

ربنا يكرمنا و ينفعنا بما علمنا و يعلمنا ما ينفعنا و يزيدنا علما

سلاااااااام عليييكم و رحمة الله و بركاته

اللهم صلى و سلم و بارك على سيدنا محمد و على اله و صحبه و كل من تبعه

موضوع جميل بجد
ربنا يكرمك وويوفقك فى الامتحانات يارب

ويارب الطرق دى تنفع مع البحــــوث(ربنا يستر)
وبالنسبة لاخر طريقة فهي فعلا بتنفع معايا اوييييي
خصوصا فى النظرى متعدد النقاط,
وكمان الالوان .

وربنا يكرمنا جميعا وننجح ونخلص الامتحانات على خيـــر,ان شاء الله

ربنا يكرمكوا جميعا تكونا عملتوا كويس في الامتحانات


ويارب تكون طريقة فيهم فادتكم


زي طريقة جسر الحمار كدة مثلا


على فكرة لو بصينا في شرحها بتحكي على اننا نعمل كلمة مميزة تجمع حاجات كتير ويبقى سهل نفتكرها

اعتقد برده هي اسمها كدة عشان تبقى مميزة ويبقى سهل نفتكر اسم الطريقة نفسها هي كمان

طيب ايه بقى احسن طريقه لحفظ كم كبير من الكلمات فى فتره قصيره

لانى عندى كميه كلماااااااااات محفظتهاش

ومن غيرها مش هعرف احل فى تلات مواد ممتدين من الترم الاول

وعلى فكره كلهم كلمات ومصطلحات سياسيه

وشبه بعض اوى ؟؟؟؟

ايه اكتر طريقه ممكن تنفعنى ؟؟ وعلى فكره انا بنسى بسرعه الصاروخ

ساعدونى يا ولاد الحلال ده انا حالتى حاله فى المواد دى

يا عينى يا بنتى عليكي فى اللغات


بصى ممكن افضل حاجة استخدمى الوان او رسومات ..دة الحل الوحيد

او اعملى اغانى من الكلمات و ترجمتها و سجليها لنفسك و احفظي الاغنية .و دى بقى طريقة حديثة الفتهالك دلوقتى

اى خدمه هههههه

جربى و قوليلى كدة

افتكري منطقية تكوين الحروف ورا بعضها
يعني احفظي الأول بتتنطق إزاي عربي واكتبي نطقها يعني play بلاي
ولما هتيجي تفتكريها تبقي عارفة أكيد إنها لازم فيها الحروف دي
واحفظي كل كلمة الأول تلات مرات ورا بعض وبعد كدة 10 كلمات مرة واحدة كل واحدة تلات مرات وبعد كدة عيدي العشرة كلهم مرة واحدة واللي نسيتيه ركزي عليه
وربنا يوفقك

ههههههههههههههههههههههه

ايه الحاجات الغريبه دى ؟

اغانى ده انا عشان اعمل اللى بتقولى عليه ده

عايزلى سنه فوق السنه انا ماليش فى الحاجات الترفيهيه دى

انتى طيبه خالص

وبالنسبه انى اعرف النطق فاى كلمه فيها نطق بتعصنى علشان بتفكرنى بالفونتكس

بس عامه انا عارفه النطق كويس الحمد لله

بس الفكره الاخيره بتاعه تلات كلمات وبعدين عشره وكده شكلها ويس ممكن اجربها دى


(ملحوظه صغونتته :ان اللى بيذاكر اى لغه اجنبيه عن لغته يكتب النطق بلغته دى حاجه غلط

ومش بتساعد على المذاكره بطريقه صحيحه لان لازم الدارس يتعلم ينطق من اللغه اللى بيدرسها )

معلش عايزه اعمل نفسى شطوره بس جت عليك بس والله كلامى جد وصح

وكمان دايما ماما كانت تقولى الكلمتينن دول من وانا صغيره

(لما فكرت اعمل الحكايه دى اول ما درسنا الانجليزى خالص) ما هى مدرسه انجليزى بقى


متشكره اوى على النصايح

واللى عندى افكار تانيه ما يبخلش الله يخليكوا

أنا قصدي علشان متكونيش عارفة شكل الكلمة بس ... يعني أنا مثلاً لحد دلوقتي فيه كلمات بشوف شكلها وكلماتها وأكون عارف معناها لكن لو حد سألني عن معني كلمة بالعربي إيه بالانجليزي وطلعت الكلمة دي مكونش عارفها أو تكون مش على بالي ومعرفش أقولها
اللهم انفعنا بما علمتنا وعلمنا ما ينفعنا
ربنا يوفقك المهم في الآخر تتعلمي صح ... بأي طريقة لكن ... صح ... بضايق أوي لما يكون حد بيقول حاجة غلط أو مش صح أو مش مظبوطة .. بيتفق معايا في ده معز مسعود علشان كدة كان عاجبني امبارح لما قال إن كلمة الإرهاب اللي بيقولوا عليها مش صح لأن ده اسمه إرجاف ... ده المعنى الأدق
اللهم اهدي الجميع لما فيه الخير

يعنى ايه ارجاف ؟

هى جايه من يرتجف ؟

" لئن لم ينته المنافقون والذين في قلوبهم مرض والمرجفون في المدينة لنغرينـَّك بهم ثمَّ لا يجاورونك فيها إلا قليلا "


كان الشيخ على جمعه بيقول ان المرجفون فى هذه الاية الكريمة هما اللى بنسميهم دلوقتى ارهاب
و هى جاية صح تقريبا يا فداء من يرتجف ..اللى هى يخلوا الناس فى قمة الرعب ..لانهم ماشيين يفسدوا و يقتلوا فيهم بغير ذنب

والفكرة ان الارهاب مختلف لان على ما اتذكر قال الارهاب تخوف اللى قدامك انه يستهين بيك عشان قوتك ..زى الايه الكريمة ... ((واعدوا لهم ما استطعتم من قوة ومن رباط الخيل ترهبون به عدو الله وعدوكم ))

احنا بنعد ما نستطيع من قوة مش عشان نمشى نقتل فى البشر ..لكن عشان نرهبهم انهم يستهينوا بينا ..يبقوا عارفين اننا اقوياء فميتطاولوش علينا و القوة طبعا تشمل القوة العلمية و الفكريه و البدنية و العسكرية و كل حاجة

فالارهاب غير الارجاف

الارجاف عنده قوة بيفسد بيها فى الارض ..لكن الارهاب (بالمعنى اللغوى الصحيح) اننا نخلى عند اعداءنا رهبة مننا و بس

دة على حسب ما اذكر و لو حنظلة سمع كلام زيادة يا ريت يقولهولنا

سلاااااام عليييييييكم و رحمة الله و بركاته

و معلش اسفين اننا خرجنا عن الموضوع ..

الله

انا اول مره اسمع المعلومه الرائعه دى

بجد ربنا يجزيكِ خير ويهديكِ يا ندى

ويجزيك خير يا حنظله

ربنا يكرمكوا نتوا الاتنين و يارب يفقهنا كلنا في الدين ... أظن إن كلام ندى أوفى بكل حاجة ممكن تتقال ... لأنها جمعت بين رأي الدكتور العبقري اللي بحبه جداً دكتور علي جمعة ربنا يكرمه ورأي أستاذ معز مسعود ربنا يكرمه هو كمان
لسة هسمع الندوة تاني برواقة دلوقتي ولو فيه حاجة هكتبها برضه في الحكاية دي ... لكن أظن كدة معقول ... جزاكم الله خيراً جميعاً

آه معلش طبعاً آسفين على الخروج عن النص بتاع الموضوع لكن ده خروج محمود كلام كويس يعني الحمد لله
لو فيه حاجة في الكلام ده نتكلم في موضوع معز مسعود
ربنا يكرمكوا

لا ابدا يا جمااعة

انتو جملتو الموضوع بالمعلومات الجميلة دي


ولو حد حابب يسال في اي حاجة تاني يتفضل على طول