السلام عليكم ورحمة الله وبركاته
ياريت لو معندكوش مانع نناقش هنا مواضيع حلقات برنامج أستاذ عمرو خالد الجديد .. صدق رسول الله
عليه أفضل الصلاة والسلام
علشان نتعلم كلنا ونشوف إيجابياتنا وسلبياتنا ونقول إيه اللي عندنا فعلاً وننميه وإيه اللي ناقصنا ونوجده
خلونا نبدأ من حلقة النهاردة 27-2-2009 ولو في مناقشات عن حلقات قبل كدة مفيش مانع
حلقة النهاردة كانت حلوة جداً ... عن حديث بيتكلم عن قصة أصحاب الأخدود والملك والساحر والراهب والغلام
كان ذكرها في قصص القرآن رمضان اللي فات عن أصحاب الأخدود .. القصة دي أنا بحبها جداااااااااااااً
من ساعة م سمعتها أول مرة في رمضان وقولت لازم تتعمل فيلم إن شاء الله
المهم ... نتناقش في نقاط مختلفة عجبتنا مذكرهاش أو نقط حابين نوضحها أكتر ولا يمنع إن تحدثنا عن كلام مكرر لكن برضه بطريقة إبداعية أكثر وبتفكير
فيه حاجة تانية لما سأل مين عنده 16 سنة ومستعد يموت علشان حاجة مؤمن بيها ؟
بغض النظر عن السن ... هل المبدأ ده موجود عند حد مننا؟
بأمانة مين رفع إيده لما قال كدة؟ وكان واضح في دماغه الهدف أياً كان بس يكون مؤثر ومفيد للناس كمان .. أو أي هدف كويس وخلاص ؟
وفكرة الجنازة دي جامدة جداً لأني طول عمري بفكر فيها ... طول عمري على مر الأوقات من ساعة م بدأنا نشوف الحياة على حقيقتها وأنا بفكر لما أموت إن شاء الله ( وده مكتوب وهنشوفه) بجانب هل هكون مستعد للموت ولا لأ ... كنت بفكر في الجنازة وأنا مش على قيد الحياة مين هيفتكرني بالخير ؟ ومين هيذم فيا؟ ولا مين هيفتكرني أصلاً ؟ شغلني كتير الموضوع ده لدرجة إني فكرت في إني أعمله فيلم برضه ( مش عارف مين هيتفرج على الأفلام دي ؟ طالما بكتب بس لحد دلوقتي ) لكن فكرت إن لو روحي مثلاً أو شبحي أياً كانت الفكرة يطلع ويسمع ويشوف وجوه الناس وهي بتتكلم عليا أو يسمع تفكيرهم عني بالحلو أو بالوحش ... كانت حاجة مهمة جداً ليا
هل تحبوا الناس تفتكركوا بالخير ؟ طب عملنا إيه علشان ده وأنا أولكوا ؟
معلش لو طولت لكن دي مناقشة وكنت عايز أعرض كل الأفكار
اتفضلوا جاوبوا لو عجبكوا الموضوع أساساً أو كان مفيد
شكراً