النهاردة روحت .. والحمد لله لأول مرة صادفت إني لقيت فرع للبنك الأهلي في شارع البحر الأعظم اللي فيه كورس الانجليزي لكن للأسف لقيته خلاص
الراجل اللي بياخد الفلوس في الشباك قالي الحساب اتقفل ... بقوله ليه قالي خلاص كملوا المبلغ الحمد لله
أنا اتضايقت أوي إني معرفتش أعمل حاجة لكن طبعاً الحمد لله دي حاجة كويسة جداً إنهم لحقوا قبل يوم الاتنين الحمد لله .. وربنا يشفيه و المبلغ ينفع فعلاً ويخف بسرعة
بس أنا كنت عايز أقول للناس اللي في الكورس ونروح نتبرع كلنا لأنه جنب المكتبة لكن كان اليوم باين من أوله مش موفق معايا .. الكورس اتلغى الحمد لله .. بس نزلت ع الفاضي في الشمس
يلا قدر الله وما شاء فعل
لكن لما دخلت البنك لقيت زحمة أوي و أنا مش رواد البنوك خالص غير مرة ولا اتنين بس مع ماما أو حد قريبي هو اللي بيتصرف لكن لوحدي وفي وسط الزحمة دي
المهم الراجل بتاع الأمن قالي ده زحمة علشان النهاردة المعاشات و اداني رقم بينه وبين اللي مكتوب بتاع 100 رقم وقالي أدامك ساعة ونص .. قولتله طب مينفعش تاخد الفلوس وتحطها انت؟
قالي لأ طبعاً مينفعش .. قولتله دي مش حاجة ليا أنا .. ده على حساب واحد هنا وكنت كاتب الرقم في ورقة قالي بتاع قناة المحور قولتله آه
قالي طب روح أول شباك
ولما روحت الراجل اللي هناك بقى قالي خلاص جمعوا المبلغ
الحمد لله يارب
أنا على قد م انا متضايق إني معرفتش أتبرع مش بس علشان الثواب .. أنا بهتم أكتر بإن الحاجة توصل بجد وتفيد ( هو ده حرام إني أقول كدة ؟
) بس بجد يارب ينفعه ويخف بسرعة
الحمد لله وشكراً لكل الناس اللي ردت ويارب نكون دايماً في الحاجات دي علطول ونلاقي المبالغ بتتجمع بسرعة وكل الناس تكون كويسة ويكون عندنا تكافل اجتماعي بقى
