اولا انا مش قصدي احرجك طبعا يا زهرة ، انا بأصحح المعلومة بس وانتي عارفة
ثانيا الرحلة يا مصطفي بـ200 ، ورجعولهم 50 جنيه كمان يا سيدي
يعني 150
بس هما اخدوها اسبوع كامل وفندق في الاقصر وحركات ، يا عيني علينا
ثالثا الدور التالت في النزل بتاع اسوان فعلا مسكون يا زهرة
الحمد لله انكم كنتم الدور الاول
ده بيحصل حاجات فيه
العيال اللي كانت فيه كانت بتقول بنسمع ناس بتصوت وناس بتصفر وحاجات رعب
قولتلهم ما انا ما رضيتش اقولكم انه مسكون
( انا كنت رايح عارف انه مسكون علشان أمي كانت من المشرفين عالرحلة دي كام سنة ، وكانت بتنزل هناك مشرفة من وزارة الشباب )
فقالتلي علي كل حاجة ومفهماني
احنا بقي نزلنا في الدور الاول ، بس احنا اوضتنا كانت تاني اوضة علي ايدك اليمين بعد الحمام الكبير ده اللي اول ما تطلعي تلاقيه علي ايدك اليمين في الدور الاول
وطبعا كنا بنطل علي المقابر والحياة فل وقشطة وزبادي خلاط كمان
:D
وبالنسبة للقطر واحنا راجعين كان موت بجد
انا اكتر واحد في الرحلة دي وكل الرحلات علي مدار السنين اتعذبت
ليه بقي؟
اقولكم ليه
اولا احنا المفروض عربية القطر بتاعت تجارة القاهرة تشيل 60 واحد
احنا مطلعين من عندنا 62 واحد
فكل العيال نطت علي عربية تجارة وحجزوا لبعض اماكن
فلقينا نفسنا انا وفريندس وعزو وجبيلي كل واحد هيقعد لوحده مع ناس ما يعرفهومش
فروحت انا عملت مشكلة وولعت الدنيا ، وهددتهم ان ليلتهم هتبقي سودة ، واني هأعرف عن طريق والدتي انها تبهدلهم عالمهزلة دي
علشان فيه تقارير بتترفع للادارة العليا في الوزارة
واللي حاصل ده مهزلة ، لأن فيه ناس كانت واخدة كراسي زيادة تفرض عليها رجليها او تحط شنطها ، واحنا واقفين
وروحت ماسك مشرف الرحلة اللي طالع من تجارة عندنا ، اللي هو واحد من موظفي الكلية
مسكته مسخرته قصاد الناس كلهم
لدرجة ان الناس كانت بتهدي فيا
في الاخر قالي هأخليكم تقعدوا انتم الاربعة سوا
واخدنا عربية الناس بتوع الزقازيق تقريبا
وقعدنا معاهم
كرسين وكرسين جنب بعض
مش 4 مقفولين علي بعض للاسف
واحنا راجعين بقي كنت اتعرفت علي مشرف الرحلة ، الراس الكبيرة
وهو زميل امي وقالي هيظبطني
بس هو للاسف اللي عرفته من امي بعد كده ، انه عنده امراض الدنيا والاخرة
علشان كده عصبي دايما
فلما روحت اكلمه ، كان بيتخانق مع ناظر محطة اسوان قصاد القطر
ومن ضمن الكلام اللي قاله للناظر ، اعلي ما في خيلك اركبه ، وانا هأطلع بالقطر يعني هأطلع دلوقتي
ان شالله توصل الموضوع لأمن الدولة
ومسك ناظر المحطة بهدله برضه
فانا ما عرفتش اقوله يظبطنا في القاعدة ، ولما جيت اقوله في عصبيته ده ، راح مزعقلي ، لأنه كان بيزعق لكل اللي قصاده
وانا للأسف حبيت انتقم منه ، فهو كان مديني الكارت بتاعه لما اتعرفت عليه في وسط الرحلة
فواحد من اللي اتزعقلهم برضه حلف ليندمه ويبهدله
قالي اسمه ايه ، روحت مديله اسمه وتفاصيله من الكارت بتاعه
قالي انا هأعرفه يعمل كده ازاي
بس للاسف لما رجعت البيت وقولت لأمي ، قالتلي حرام عليك ، ده هو عصبي علشان عامل عمليات وشايل أجزاء كتير من بطنه
وعنده أمراض الدنيا
فحسيت اني عملت حركة زبالة اوي
يللا الحمد لله
بس طبعا بدأت معركة تانية في العربية واحنا راجعين
والناس الصراحة كانوا محترمين جدا معانا ومعايا بالذات
رغم اني كنت شبه غلطت فيهم ، وفي واحد منهم ، كان اسمه ثروت
ثروت ده كان اصغر مننا تقريبا بسنة ولا اتنين ، بس كان أحرف واحد في الشطرنج
وكان بيغلب كل الناس ، رغم ان الناس دول كان فيهم اللي عنده 50 سنة مثلا
وانا كنت شديت مع اللي اسمه ثروت ده ، وكانت ممكن تقلب خناقة
بس سبحان الله
بعد ما الامور اتظبط ، وهما بكرمهم ظبطونا احنا الاربعة سوا في كرسين قصاد بعض
اتصاحبت انا وثروت ، ولاعبته شطرنج
وكان أحلي ماتش لعبته في حياتي
وهو بجد رهييييييييييييب في اللعب
بس بشهادة اني اكتر واحد صمدت قصاده في حياته
بس اكيد طبعا في النهاية غلبني
:D:D
طبعا احنا نشفنا في التكييف في القطر
لكن بعد ما طلعت الشمس ، يعني بعد أكتر من 12 ساعة تقريبا من ركوبنا في القطر
اكتشفنا ان كل العربيات فاصلة التكييف وطلبوا كده من المشرفين
الا احنا
والتكيف كله زي ما يكون اتركز عندنا احنا بس بقوة تكييف القطر
وبعد ما تلجنا والشمس طلعت وعرفنا اننا نقدر نفصل التكييف
خليناهم يقفلوه
كنا شبه جثث مثلجة
بس ليه بقي انا اكتر واحد في تاريخ الرحلة دي اتعذبت
علشان انا كنت قاعد في الكرسي اللي جنب الباب
الباب اللي بين العربية اللي بعدنا
الباب ده مش جرار طبعا ، كان بيتفتح زي الابواب العادية
لكن المشكلة بقي
انه الباب الوحيد في القطر من العربية 4 لحد العربية 11 اخر القطر ( عربية كلية تجارة )
هو الباب الوحيد اللي الكالون بتاعه بايظ وما بيمسكش في جسم القطر
ودايما بيتفتح لوحده
خصوصا مع فوارق الحديد في قضبان القطر
او اي حد معدي بين العربية
وانا كنت نايم عالكرسي اللي من برة ودماغي مايلة ناحية الممر
وكنت رايح في النوم من التعب والتلج
وكان كل ما حد يعدي او فارق كبير في القضبان
الباب الحديد الضخم والتقيل جدا ده ، بيتفتح بقوة جامدة جدا
ويرشق في راسي ، والاوكرة كمان
ستر ربنا ان دماغي ما اتفتحتش
ومش مرة ولا اتنين
دول كتيييييييييييييييييييييييير
الصراحة انا قومت مفزوع اول 3 مرات ، بعد كده اعتادت
:D:D:D:D
يللا اطول مشاركة في تاريخ الموضوع ده
D:D:D:D:D