حكايات الامتحانات ( الجزء الرابع )

سلام عليكم و رحمة الله و بركاته

كل سنة و انتوا طيبين ..الموضوع بتاع كل امتحانات

اللى بنسلم عى بعض و نحكى مغامراتنا علشان نضحك شوية و اهم حاجة طبعا نتطمن على بعض و ندعى لبعض


ها بقى ..عملتوا ايه النهاردة ؟؟

و ربنا معانا و ويوفقنا دايما يا رب

انا الحمد لله تمام ممكن اجيب جيد جدا و تبقى اول مره اعملها فى ماده فيها رغى كتير
بس و احد اعرفه امبارح و النهارده الصبح كانوا اسواء ايام حياته
كان عنده تمويل امبارح و مكنش له ورقه و طلعت مع مراقب تانى فى لجنه تانيه و اخد الورقه الساعه 1 و قالوله ليك 10 دقائق بعد المده متخلص ( هتخلص 2 )
و النهارده كان الامتحان الساعه 9 راح 12 على اساس ان الجدول اللى اخده من اتحاد الطلبه كده و العميد قاله ملناش دعوه
يعنى راح منه مادتين فى يومين

السلام عليكم جميعا
كل سنة وانتم طيبين وان شاء الله تكون سنه لذيذة وسعيدة عليكو ان شاء والله ونحتفل كلنا بالتخرج ان شاء الله
بالنسبة لامتحان النهاردة جزء طه الطاهر بصراحة خرفت فيييييييييييييييييييييه جااااااامد وحرقلي دمي جاااااااااامد جايب اختيارات والاختيارات جايبها غير مباشرة وشبه بعضها بيعجز يعني من الاخر
بس الحمدلله لحقت نفسي فى سؤال اكمل و3 من اكتب بأيجاز كل اللى لقيته موجود من الملزمة يعني وربنا يسترها معانا
اما بالنسبة لجزء شاهندا الدكتورة دي بجد
جامدة جدااااااااا امتحانها جامد اخر حاجة وفعلا زي ماقالت مخرجش من التطبيقات ربنا يباركلها
ويسترها معانا في بقيت المواد والتصحيح والنتيجة ان شاء الله

السلام عليكم,

انا الحمد لله طبعا امتحان التخطيط كان جميل جــدا الحمد لله
ربنا يبارك لدكتور اشرف يارب -- والتصحيح يكون زى الامتحان كده كمان

بس للاسف حصلت مشاكل معايا وبدات امتحن 9وتلت-لانى مكنتش
لاقية اسمي فى اللجنة--وطبعا كنت بكتب بسرعة فكنت بشخبط بس مش كتير
اوى يعنى

بس بجد حسبي الله ونعم الوكيل فى كل موظف مش بيشوف شغله كويس
وتيجي على دماغنا فى الاخر,,,الحمد لله

* وانتى عملتى ايه ياندى ؟

الحمد لله الامتحان كان كويس أوي
ويارب كل الامتحانات تكون كدة وطبعاً ده من تاسع المستحيلات
بس مفيش حاجة بعيدة عن ربنا
إن شاء الله تكون كل الامتحانات الجاية كويسة على كل الناس يارب
ربنا يوفق الجميع

4الحمد الله برده امتحان معدله كويس قوي
يمكن طه الطاهر كان مفاجئه بصراحه
بس عدت وكفايه كده

ربنا يستر
وشاهنده روعه وخرائط كانت تحفه انها رسم بس

الحمد الله

ازيك يا بوبه انتى وحشااانى خالللص ..كان نفسي اشوفك امبارح و اعدت ادور عليكي ملقتكيش

هو انتى مش فى العيوطى ؟؟

و الحمد لله انكوا كلكوا الى حد ما عملتوا كويس

و ربنا يكون فى عون صاحب فامبير

الله اعلم الخير فين ..ربنا يصبره و اهم حاجة مياسش و يركز اوى فى اللى جاى عشان يلحق نفسه


و معلش يا هبه انك اتاخرتى على الامتحان
اصلا لجنه متخلفة عقليا ..مش ممكن دة بيهزروا بجد ..ايه اللخبطة دى ..كنت متضايقة اوى من عدم التنظيم


انا بقى الحمد لله عملت كويس فى الامتحان الجميييل اللى جالنا دة
الحمد لله كما ينبغى لجلال وجهه و عظيم سلطانه


بس يمكن هو السؤال بس رقم 2 فى صح و غلط اصلا الدكتور كان شارحه بالعاميه كدة بس لكن الكتاب كان فيه كلام غلس كدة
فانا اللى افتكرته من الكتاب كتبته (بالظبط كانت جملة واحدة ) و كتبت الشرح بتاع الدكتور اللى مكنش ليه علاقة باللى فى الكتاب ان من لم يخطط فقد خطط للفشل ..قلت ما هو كلامه اكتبه و خلاص

عموما الحمد لله هو سؤال صغنتت اصلا

بس اللى وترنى فى الامتحان ان انا نسيت احل السؤال دة اصلا و حليت رقم 1 و بعدين كتبت رقم 2 و قريت رقم 3 و حليتها

فجيت احل 3 لقتنى بحلها تانى

فخدت بالى انى نسيت رقم 2 و مكنتش لاقيالها مكان بعد رقم 1 انى اعدت قام فى مخى اشرحله الرسمة بقى و ادى امثلة و كنت اخر روقان و مستخسرة المذاكرة فاعدت ارغى

فملقتش حل لانى احل السؤال رقم 2 غير انى لقيت معايا الكوريكتور فاعدت امسح نص صفحة كااامله ..وجعتلى ايدي من الضغط عليه و و اعدت انفخ فيها عشان تنشف (متهيالى كنت قلق فى اللجنه )

و طبعا دة ضيع شوية من الوقت فبقيت احل الباقى بسرعه بقى و بدون روقان و خلصت 11 الا 5 و صحبتى اعدت تتريق عليا ان بتاخر
بس انا برضه لو كنت خلصت بردى مكنتش خرجت عشان مبحبش اخرج بدرى و بعدين افتكر حاجة و اندم انى مش هعرف اكتبها

معلش رغيت كتير عشان اقولكوا انا عمللت ايه

الحمد لله و يا رب كل الامتحانات تبقى حلوة و جمييييييلة و ربنا معانا كلنا محاسبة و ادارة فى المحاسبة الاداريه

و ادعولللى كتيير

سلاااااااام عليييكم وو رحمة الله و بركاته

إيه المغامرات دي كلها؟
كويس إنك افتكرتي تجاوبي بعد كل ده .. ده أنا توهت من اللي قولتيه ده
بس الحمد لله
وربنا يسهل في اللي جاي
إن شاء الله
شدوا حيلكوا

ربنا يوفقنا كلللنا

و ربنا معانا مع دكتور خالد
و يا رب نبقى قاعدين فى امتحانه هاديين و مبتسمين زيه

انا بحس انه ما شاء الله دايما هادى و مبتسم ..ربنا يكرمه و ينفعنا باللى علمهولنا

احنا بقى ربنا يخليلنا دطتور حسين عطا

هو طول السنة كنا مرعوبين من المادة لحد ماخلاص معاد الامتحان قرب فماكنش قدامنا بديل الا اننا نذاكرها

وسبحان الله اما دخلنا فيها كدة و مشينا فيها شوية طلعت كويسة الحمد لله

الامتحان هو كان المفروض يجي 24 صح وغلط خلى 17 صح وغلط والباقي 4 اختيارات بس الحمد لله كان كويس

وربنا يكرمنا ان شاء الله في التكاليف

ربنا يكرمـــــــــــــتك انت كدة طمنت حوالى 400 واحد غلبان فى ادارة

يعني دكتور حسين امتحاناته لذيذةة و مبتخوفشش

يا رب عقبالنا نطلع مبسوطين من امتحانه

و ربنا معاك فى التكاليف يا رب تجيب فيها زيي ..اصلى فرحانه اوى نى جايبة فيه 20 الحمد لله
عقبالك فى كل المواد ان شاء الله

سلام عليكم
انا قولت اشارك بس علشان بقالي كتير مش بدخل

و يا رب يكون كل الناس اتوفقت في الامتحان الي فات و عقبال الفرحه الكبيره ان شاء الله

وعليكم السلام ورحمه الله وبركاته

انا بقى ندى هى اللى قالتلى اجى هنا

ربنا معاكى يا فداء يا حبيبتى و ابقى ادخلى فى موضوع حكايات الاامتحانات عشان تطمنينا كل مرة و تقوليلنا ندعيلك عشان مش كل الناس بتدخل اللعب اليومين دول
_________________


بصراحه انا كنت عايزه اكتب

هنا من الاول بس قولت هتقولوا عليا متطفله ورخمه

وايه اللى جابها هنا

بس ندى هى اللى قالت والله مش انا

استحملونى بقى

وان شاء الله ربنا يفرحكوا بالتخرج بتقديرات جميله

ويفرحنى بانى خلصت تانى سنه من الخمس سنين

ويارب تكون بتقدير حلو

قولولى بقى

هو قسم محاسبه عليه امتى الاسبوع ده واوعوا تقولوا انهم امتحنوا خلاص

اصل معاكوا واحده فى القسم كانت معايا فى الرحله وهى اللى عرفتنى على مها

وانا عايزه ادعيلها ها امتى ؟؟؟؟؟

كدة يا فوفه ..مش انا مديالك مواعيدنا و قلتلك محاسبة بعدنا على طول

بصى يا ستى ..احنا نخلص و بعدنا بساعه محاسبة يبداوا

اوعى تنسينا بكررررررة بقى

و ربنا معاكى يا حبيبتى النهاردة انتى و بسبوسه عشان معاها تكاليف و محمود الجوهرى و سنبلة و ناديه و مصطفى mb بتاع اول موضوع جمع الكوميرساوية

ربنا يوفقكوا كلكوا انتوا و كل المسلمين و يكرمكوا و يفتح عليكوا و يرزقكوا بالاجابات الصح و ينور بصيرتكم و يساعدكم و يبعد عنكوا الدوشة و الغشاشين و كل حاجة وحشة و يهديلكوا اعصابكم و يفكركوا بكل اللى اتعلمتوه و ذاكرتوه و لو حاجة مش عارفينها يفهمهالكوا و يخليكوا تكتبوا احلى اجابة و تاخدوا عليها الدرجات النهائية

اللهم صلى و سلم و بارك على سيدنا محمد و على اله و صحبه و كل من تبعه

و متنسوناش بكررررررررررررة
ادارة من 9 -11
و محاسبة من 12 -2
عايزين دعوات جامدة و خليكوا جدعين و اقروا سورة يس و ادعولنا ..بتاخد حوالى 5 دقايق بس

يا رب وفقنا كلناااااااااااااا

سلااام علييكم و رحمة الله و بركاته

mohamed14 كتب:

سلام عليكم
انا قولت اشارك بس علشان بقالي كتير مش بدخل

و يا رب يكون كل الناس اتوفقت في الامتحان الي فات و عقبال الفرحه الكبيره ان شاء الله

ربنا يكرمك و يوفقك و مستنيين مشاركاتك فى الاجازة ان شاء الله

طوييييييييل و كمان عايز تفكييييييييير

طب نفكر امتى ولا نحل امتى

ما هو يا اما امتحان عايز تفكير و صغير ..يا طويل و سهل

انا زعلانه اوى انى الوقت مكفاش معايا ..الحمد لله على كل شىء

ممكن يكون الامتحان دة خير ..الله اعلم


يلا ربنا معانا فى البنوك و بقيت لمواد

وابقوا طمنونا كلكوا عملتوا ايه ؟؟

الحمد لله كما ينبغى لجلال وجهه و عظيم سلطانه

ايه اخبار الامتحان

بالنسبه للسؤال الاول والى كان تاعب ناس كتير
اعتقد ان الفكره فى اننا هنتعامل مع كل شهر لوحده ونعمل معادله الربح المستهدف لكل شهر
(كانها
قايمه دخل لكل شهر) وهنقرض التكلفه المتعيره ب س والثابته ب ص وكده يبقى
عندنا معادلتين فى مجهولين نحلهم ونطلع النواتج لو كلامى صح هتطلع التكلفه
الثابته غالبا80000 والمتغيره 90 جنيه للوحده

يس الامتحان عموما مش سهل زى ما وعدنا

يالا نقول الحمد لله ونشد حيلنا بقى فى الجاى ,الى فات كوم والى جى كوم تانى
ياااااارب سهلها علينا

كويييييس و الله ..حاجة ضمنناها ان شاء الله

هو انا حليت بطريقه تانيه بس طلعتهم زيك كدة برضه

هو الاول كان مشكلته بالنسبه للى اعتمد على الملزمة اعتقد ما فهاش الفصل التانى اصلا بتاع معدل التغير و كدة

الحمد لله انى مفتحتهاش اصلا

بس انا كانت مشكلتى فى التالت و الرابع لان الوقت كان قليل فمعرفتش افكر

و التانى قلقانه منه .. اصلى حسيت انه سهل عن اسئلة القرارات اللى بتبقى دايما صعبه ..فقلقانه اكون فهمت حاجة غلط ..ربنا يستر

و كمان طلع معايا نواتج غريبه ..يعني لقيت ان المنتج البديل هيحقق خسارة مش ربح و كبييرة اوى كمان و اخترت التصنيع فى الحالتين


و اللى مضحكنى انى الفت و اخترعت حاجة ..هى ان نسبة صافى اربح لحقوق لمساهمين دى و لا مش فاكرة اسمها ايه هتبقى بتساوى رقم على س
حيث ان حقوق المساهمين = س


بقولكوا ايه لوعندى اجابات غلط من اللى بقول عليها دى محدش يعلق لو سمحتوا عشان مزعلش

يلا بقى ..خلينا فى البنوووووووووووووووووووووووووووووووووووووووك


يا رب وفقنا

دة التقرير السنوى للبورصه ..مممكن ينفع فى البحث للناس الشاطرة اللى زيي و معملتوش حتى الان

[ندعوك للتسجيل في المنتدى أو التعريف بنفسك لمعاينة هذا الرابط]

خير خير ان شاء الله متزعليش ومضيقيش نفسك

ونركز بقى فى البنوك لان الماده دى بجد عايزه شغل غير انى مسترخمها اساسا

ربنا ييسر ويسهل علينا يارب

هى مااادة طوييله اوى ..بس ممكن تخليها لذيذة و تستوعبها اكتر لو تخيلتها فى صورة نظام (انا توصلت لكدة فى اخر محاضرة مذاكرة ليها)

تخيله نظام ليه مدخلات و عمليات و مخرجات و بيئه بياثر و يتاثر بيها و حاول تركب كل حاجة فى المادة هى مدخلات و للا عمليات و لا مخرجات و لا عوامل خارجيه بتاث و لا حاجة احنا بناثر فيها و تخيل نفسك مدير بنك قد الدنيا كدة و قاعد تخططله و متخيل الرؤية بتاعت البنك دى حواليك

هتحس ساعتها انك حابب المادة شوية عن الاول ان شاء الله

و ربنا معانا كلنا فيها

ربنا معاكوا
انا النهارده كنت نازل الأمتحان في أمان الله ومتلصم بقى في المذاكره ومش ناقص وبعدين جالنا تليفون من أخويا الصغير من المدرسه هو عليه إمتحانات برضه في 5 إبتدائي لغات وبيعيط بقى وبيقول لوالدتي إن بين الإمتحانين إتخبطت فيه كوره في وشه وووالدتي أول ما سمعت كده توقعوا أيه اللي حصل ساعتها وانا قلقت طبعا لأن الكلام ده كان الساعه 11 إلا خمسه وكان عليه إمتحان بعد الفسحه الساعه 11 يعني كان فاضله 5 دقايق على الأمتحان خدت التليفون وهديته شويه وقلتله لو تقدر تطلع اللجنه قالي اه قلتله أدخل عشان امتحانك واحنا هنجيلك المدرسه
بعد كده كنت هروحله قالولي لا روح امتحانك
ورحت الأمتحان والحمد لله اطمئنيت عليه قبل ما أدخل اللجنه وقالولي إنه كويس
بس كان موقف متوتر وقلقني وحسيت إني نسيت اللي ذاكرته بس الحمد لله المعلومات مطارتش
ودخلت الإمتحان بس كان طويل زي امتحان الأحصاء بتاع د/محمد وحيد
وفي حاجات عكيت فيها
بس اللي مطمني د/محمد عبد العظيم لانه مش بيحاسب على الأرقام كتر من الخطوات
كفايه كده
ويارب الإمتحانات اللي جايه تكون أفضل من اللي فاتت

تانى يوم كويس
ربنا يسهل و الباقى كمان يعدى على خير

مش عارفه واضح ان تانى ماده دى فعلا كانت وحشه عند ناس كتير

اصلى كان عندى اكتر ماده بكرها وكنت خايفه منها

والله ذاكرتها كتير اوى ومن اول السنه وانا بذاكرها

والمعيده بعد كل جزء كانت بتعمل لنا امتحان

وذاكرت الماده كلها يوم امتحان الشفوى ورجعت ذاكرتها تانى يوم الامتحان التحريرى

وبعد كل ده ما حلتش حلو والامتحان كان رخم

ونسيت اجابه سؤال والفتها

يلا الحمد لله المهم الباقى

يارب بقى انهارده يكون امتحان حلو

والله انا بجد عملت اللى عليا وحفظت التسع قصايد كلهم

وبالورقه والقلم كمان

يااااااااااااااااااااااااارب افتكرهم ولو مفتكرتش بعد الشر يعنى

افتكر كلمات تبقى بنفس المعانى واكتب الكلمات صح والجرامر كمان يبقى صح

وياااااااااااارب الدكتور ما يجبش القصيدتين الرخمه

اللى عارفه انه هيجبهم علشان يرخم علينا

ادعولى بقى بالله عليكم انا متفائله بيكم ان شاء الله

المره اللى دعيتوا لى فيها حليت حلو عقبال انهارده يارب

ربنا يستر

ربنا معاكى يا حبيبتى و يوفقك ..ادعوا لفداء كلكوا يا جماعه بتمتحن النهاردة

زمانك بداتى دلوقتى حالا يا حبيبتى ربنا معاكى و يفتح عليكى و تفتكرى كل حاجة على طول


و هبه .. معلش يا بنتى قدر الله و ما شاء فعل ..خلينا فى البنووك

فامبير ..مبروك و يا رب دايما تخرج مبسوط من الامتحان و يوم النتيجة كمان

محمد مجدى..الف سلامة على اخوك يا رب يكون كويس ..و ان شاء الله الامتحان يبقى حلو فى تصحيحه ..و تجيب 20 ان شاء الله


و ربنا معانا كلنااااااااااااااااا