قسم ادارة & اخر شهر

بالنسبالى انا شايفة ان دى طرق مناسبة لمذاكرة موادنا


1- بحوث عمليات

طبعا دى المادة اللى قالقه القسم كله

بس لو بصينالها هنلاقيها صغيرة و عبيطة ان شاء الله

بس هى بدووون شك عايزة تركيز جامد

فكل الفكرة ان كل واحد يقعد يروووق خالص خالص و يصلى و يدعي ربنا كدة و يروق و يقعد و يفتح المحاضرات ( المصدر الوحيد ..مع شوية السكاشن ممكن برضه )

و يذاكر المحاضرات واحدة واحدة بشويش و يحاول يفهم كل نقطة و ميفوتش حاجة منغير ما يفهمها

و اللى منعرفوش نسال بعض و اكيد واحد هيكون فهم الحاجة ان شاء الله

و نخلى عندنا صبر فى العلم

سيدنا موسى لما كان رايح يتعلم من سيدنا الخضر ربنا يبحانه و تعالى اوحاله انه هيشوفه فى مكان اسمه مجمع البحرين و هو مكنش يعرف فين المكان .. فنلاقى الاية بتقول (( و إذ قال موسى لفتاه لا ابرح حتى ابلغ مجمع البحرين او امضي حقبا ))

يعني مش هيتوقف الا لما يوصل لمجمع البحرين او يمشى حقبا ( جمع حقبة من الزمن .. الحقبة بتوصل لملايين السنين )

فشايفين الصبر

دة اللى احنا عايزين يكون عندنا

دكتور حسين بجد راجل دمااااغ جامدة جدااا

انا قريت على ظهر كتاب ليه فى المكتبة المركزيه انه واخد جوايز جامدة و داخل فى موسوعات مش فاكراهم بالظبط بس باين موسوعة اهم اشخاص فى العالم و الموسوعه الامريكية لعلماء التمويل

فبجد لو هو صعب شوية معانا .. فاحنا لازم نصبر شوية عشان نتعلم

من الاخر محدش بيتعلم ببلاش

و ان كان تعليمنا ببلاش ( الى حد ما مدعم ) فاحنا مش هنتعلم بجد برضه ببلاش و منغير مجهود و صبر

فنهدى و نصبر و نحتمل دكتورنا اللى بجد هو طيب جدااا و بيحبنا جدااا ..بس عصبى

و هو قال كدة عن نفسه من الاول

فنستحمل و نذاكر و نجتهد و نتعلم

و هنلاقى المادة سهله و بسيطة خاااصةً اننا خدنا حاجات كتير منها قبل كدة


فكل هدفنا اننا نتعلم تانى اللى اتعلمناه منغير ما نفهمه


و بالنسبة للى سمعت انه حصل النهاردة ..فان شاء الله هى مرة من المرات اللى اتعصب فيها و كله هيبقى تمام باذن الله

احنا بس نعمل اللى علينا و ربنا لن يضيع اجرنا اذا احسننا عملا

و الله الموفق

2- التخطيط و الرقابة :


دى بقى و لا قلق و لا حاجة ان شاء الله

دكتور زى السكر

و مادة سهله و خفيفة ان شاء الله

و هى المحاضرات و بس زى ما قال الدكتور

و محاضراته لو صفيناها ( سيبكوا من محاضراتى انا برغى كتير هما كلهم ميجوش 30 صفحة اللى خدناهم )

فايه اسهل من كدة بقى ان شاء الله

اذاً كل اللى علينا
نقرا المحاضرات بفهم و نحاول نلخصها و نعمل شوية خراي و رسومات عشان مننساش و كل واحد يذاكر بطريقته و لو حصل يعني و حد مفهمش حاجة ..يسال و احنا تحت امره

و محدش يتكسف يسال ..عادى جدااا كلنا ساعات مبنفهمش حاجات

----------------------------

3- ادارة البنوك :
------------

هى مادة ممكن طويلة .. بس برضه مش مرعبه

انا عن نفسي مفتحتهاش خالللص بس متفائلة خير ان شاء الله

و شافة انها ممكن تتذاكر بطريقة حلوة

كل واحد يجيب المحاضرة و يقراها يمسك جزئية جزئية

يمسك كل جزئية يقراها من لمحاضرة ثم من الكتاب و يكون فى ايده كشكول حلو كدة و يروح يكتب عنوان الجزئية و تحته شرح مبسط للجزء دة من خلال اللى فهمه من المحاضرة و الكتاب

بس الشرح اللى يكتبه يكون مستوفى كل الاجزاء المهمه

و هكذا مع كل جزء

و يكتب الحاجات اللى الدكتور بتقول عليها مهمه و اى اسئلة و كدة

و بعدين فى النهاية هيلاقى عنده مصدر متكامل يشمل المحاضرة و الكتاب

يذاكره ايام الامتحان و يحل اسئلة التطبيقات اللى هتنزل ان شاء الله شفوى كدة و اللى يحس انه مش عارف يحلله يرجع و يحاول يفهمه تانى

و باذن الله نلاقى المادة حلوة و بسيطة و نقفلها باذن الله


و اه نسيت .. الابحاث مننساهاش
----------------------------------------

4- المحاسبة الادارية :

نذاكر كل فصل من المحاضرة و نفمه كويس و ممكن نلخصه ( القوانين و طريقه الحل و دة )بعدين نحل اسئلة الكتاب و بس كدة

و ان شاء الله بكدة هنكون فاهمين الكتاب و المحاضرة و عاملين كل اللى علينا و هنقر نفهم اى سؤال ييجي باذن الله

------------------------------------

5 - الاقتصاديات :

أ - الجزء المحاسبي :

هى المحاضرات ..نفهمها كويس اوى .. يعدبن نقعد نحل بقى فى التطبيقات و الكتاب و نحل على قد ما نقدر

بس المهم نفهم كويس كل حاجة بتتحل ازاى و برضه نلخص القوانين و كدة و ان شاء الله تبقى مادة كويسة و تماام

--------
ب- الجزء الادارى :
زى ادارة البنوك ..نفس الطريقة .. المحاضرة و التاب بسرعه كدة عشان ل فى حاجة ناقصة و نلخصهم سوا بفهم و بعدين نقرا ملخصننا ايام الامتحانو نحل التطبيقات و لكةه باذن الله هيكون سهل و بسيط


و بكدة خلصننا كل المواد

شفتوا الدنيا سهله ازاى

حد عنده طرق تانى يا ايها الكوميرساويين الاداريين ؟؟

سلااااام عليكم و رحمة الله و بركاته

احب اضيفلك يا ندى وبجد كلامك تقريبا روعه على كل المواد بس انا ذاكرت اقتصاديات محاسبه وخلصتها فى يومين وهيه سهلهجدا ومش محتاجه اى حاجه وذاكرت محاسبه اداريه وطبعا المحاضرات و الكتاب كويسييين اووووووى بس الاداريه محتاجه فهم كبيييراكتر منه حفظ وتتوالو بقيه المواد ان شاء الله همسك فى الاداريه لغايه لمااخلصها وبعد كده ابدا اداره بنووك لانها كلها رغى وشكرا

ربنا يكرمك ..و اهلا بيك نورت منتداك

و بجد شكراا اوى على مشاركتك المبشرة دى ..ان المادة تتذاكر فى يومين فده شىء يخلينا نتفائل جداا

ربنا يوفقك و يكرمك

و انا معاك طبعا ان الادارية عايزة فهم كويس اوى

و كل المواد عايزة فهم عشان نتعلم صح و نبقى مش مجرد بنذاكر للامتحان ..لكن نتعلم و نحاول نتخيل و نشوف ازاى ممكن نطبق الكلام دة

علشان نستفيد منه بجد

انا فى حاجة بحبها اوى .. انى و انا بذاكر اتخيل انى بشتغل و بطبق

يعني انا حاسة انى اشتغلت مديرة تسويق و مديرة موارد بشريه و مديرة مشتريات و مديرة مخازن قبل كدة بس فى خيالى

بجد الموضوع دة بيخللى المذاكرة حلوة و لذيذة و مفيييدة

لانك بتعمل محاكاة للموقف

نفسي احس باى تفاعل من هذا القسم

هو انتوا مش بتشوفوا الحاجات دى و لا بتشوفوها و ماتردوش

فينك يا مجموعه ج يا حبيبتى ..ايام ما كنا بنرغى و نتناقش

انتوا مجموعه ساكته كدة

معقوله مفيش غير واحد بس اللى ذاكر

انا هتفاعل شويا ياندودا

ادارة البنوك ملهاش حل غير الكتاب

انا ذكرتين فصلين بس الاول والرابع

لخصت الكتاب كتبت العناوين وقريت الى تحت كل عنوان وكتبتوا بطريقه ملخصه شويا عن الكتاب

والمحاضرات باخد منها عناوين بس

والعملى نويا ان شاء الله اذاكروا من المحاذرات والسكشن

منورررة يا حبيبتى

و ربنا معاكى و تجيبي احلى تقدير ان شاء الله

و عايزة ابقى اشوف منك بقى التلخيص للكتاب عشان معرفتش الخص حاجة و كتبت الفصلين بمحاضراتهم فى 96 صفحه بس ههههه

و يلا قوليلنا بقى بقيت المواد ..عشان انا طماعه هستغلك بقى مش صبحتى

مجموعه ساكته
ممممممم
والله اسم جامد
طيب هوا انا مش متعود ادخل على ساحات المذاكره عموما يعنى ....
هوا المشكله الاساسيه بالنسبالى اداره البنوك الفصول بتخلص بالعافيه
انا عملت الاول والثانى وجيت ادخل فى الثالث الثالث ده لوحد كان هيجبلى انهيار عصبى
بس انا هشتغل شويه من المحاضرات وهيا على فكره نزلت تطبيقات كمان يعنى ربنا ييسر علينا
التخطيط لسه مفتحتهوش
المحاسبه الاداريه عيبها ان مفيش تمارن محلوله كتير فى الكتاب ماده زى دى كان المفروض ينزلها تطبيقات
يعنى والباقى اهو يا مسهل

ايوة كدة ..احمدك يا رب ..

انا برضه ادارة البنوك تعبتنى نفسيا .. هى يمكن مفهاش حاجة صعبه تتفهم ..بس كتيييييييييير اوى .. فبصراحة كانت المفروض تتذاكر من الاول عشان يبقى ليها وقت ..ربنا يستر و الوقت يكفى ..انا برضه فى التالت

ربنا معانا كلنا فيها

و الحمد لله ان فى تطبيقات هتسهل الموضوع كتير فى المراجعه بالذات