بعض ما قيل في ندوة الأستاذ/ معز مسعود في ساقية الصاوي

السلام عليكم ورحمة الله وبركاته

كنت قد حضرت ندوة للأستاذ معز مسعود لأول مرة في حياتي ولكن كانت هناك سابقة أنني شاهدته منذ فترة في الطريق الصح وأعجبت بكل ما يقول واتفقت معه والأهم من هذا هو أسلوبه وطريقة تفكيره جزاه الله عنا خيراً و هدانا إلى الطريق الصحيح معنا إن شاء الله
وملخص عما تذكرته وأهم ما قيل نظراً لأنني وصلت متأخراً للأسف في الثامنة والنصف وأهم ما فهمته أنه كان يتحدث قبلاً عن ما حدث بغزة وصمت العالم العربي المعتاد وإن كان هذه المرة لم يكن كسابقاتها و الجديد أيضاً في تحرك الغرب والاستجابة التي أدت أيضاً إلى المظاهرات والمساعدات وهو ما دفع أحد المطربين غير المسلمين وهو مايكل هارت لغناء أغنية عن غزة وأسهب في كلام عن لما وصلنا إلى هذا الوضع وماذا نفعل كي لا نقف في مكاننا وكيف تكون طريقتنا مختلفة في التفكير والتعامل وغيرها و أخذ يشرح حديثاً للرسول صلى الله عليه وسلم
جاء في الحديث الذي رواه أحمد وغيره بإسناد حسن عن ثوبان رضي الله عنه أن النبي صلى الله عليه وسلم قال : يوشك أن تداعى عليكم الأمم كما تداعى الأكلة على قصعتها قيل يا رسول الله أمن قلة بنا؟ قال لا ولكنكم غثاء كغثاء السيل تنزع المهابة من قلوب عدوكم منكم ويوضع في قلوبكم الوهن قالوا يا رسول الله وما الوهن؟ قال حب الدنيا وكراهية الموت
وفسر الحديث بأن وضعنا الآن أصبح كأننا مائدة للغرب يتقاسمون ويتعازمون على مواردنا بشتى طرق الاحتلال كما يفعل من يتعازمون على الطعام و عرض مشهداً من فيلم يتحدث عن فترة الرئيس بوش الابن وما كان يفعله من ايجاد حجج لتبرير مواقفه في البلاد التي احتلتها أمريكا
وفسر الحديق بأن الغثاء هو القاذورات وما يتكون ويندمج في ماء السيل عندما يجري وهو ما لا يفيد .. أي أن ما سيحدث ليس من قلة الصالحين ولكن سيصبح الصالحين في الفاسدين قد لا يكون لهم تأثير وكل ذلك بسبب حب الدنيا أكثر مما يستحق أو أكثر من غيرها وكراهية بمعنى مخافة الموت مما يعني مخافة لقاء الله
ولا يخلو الكلام من بعض الأمور الأخري المتصلة ولكني حقيقة لا أتذكرها .. وسأحاول البحث عن فيديو تلك الحلقة إن شاء الله

ربنا يكرمك ..و يجازيك كل خير انت و استاذ معز مسعود

احنا فعلا كتير بس مشكلتنا يمكن ان قلت حتة الامر بالمعروف و النهى عن المنكر ..يعني زى ما انت ما قلت فى صالحين بس مش باينين اووى ..يمكن علشان مبينصحوش اللى حواليهم و ياخدوا باديهم

و دةغلط ..لأازم كلنا نمسك فى بعض علشان مانغرقش ..منسيبش واحد بيغلط و نقول و انا مالى ..اضعف الايمان ننكر فعله بقلوبنا

و كنت سمعت معز مسعود بيتكلم عن حته الامر بالمعروف و النهى عن المنكر و قال تقريبا ان تغيير المنكر بالقلب ..يعني انى مبقاش شايف ان الحاجة الحرام دى عادية و اقعد معاهم و اكتفى بس انى مبعملهاش
لكن مثلا واحد قعد مع اصحابه و بيشربوا اعوذ بالله خمرة ..يروح يسيب مجلسهم و يسيبهم ..دة دليل استنكاره للموقف و انه يكون قلبه مش شايف ان دة شىء عادى ما دام هو مبيعملوش و يدعيلهم بقلبه يبطلوا دة

دة اضعف الايمان

فلازم يبقى عندنا النصيحة بس بالحكمةو الموعظة الحسنة و الهدوء و اختيار الوقت المناسب و الكلام المناسب للموقف

و النصيحة الاحلى كمان انها تكون بتطبيق الكلام قدام الشخص

او ممكن تكون غير مباشرة

المهم نكون اذكياء و نشوف احسن طريق لنصح الاخرين بحيث نوصلها لقلبه مش نخليه يكرهنا و يزهق مننا

و ربنا يهدينا كلنا و يحفظنا

--------

أمين يارب ... بس كان معظم الكلام كلامه لكن أنا كنت بحاول أختصر أو أكتب اللي فاكره .. ربنا يكرمك ويكرمه ويجزيه هو الخير أنا معلمتش حاجة ومقولتش الكلام ده ... مش بحاول أنسبه لنفسي يعني ... بس بنقله للاستفادة
يارب يهدينا كلنا ويحفظنا يارب

[ندعوك للتسجيل في المنتدى أو التعريف بنفسك لمعاينة هذا الرابط]

النهاردة اتكلم فى نفس الموضوع تقريبا لانه حكى الحديث برضه

و قال صح اننا مقصود ان المسلمين هيبقوا كتير بس تتغير نفسيتنا ..علشان مبقاش فى عند الناس فى العصر دة المنظومة الكامله للفهم الصحيح للدين
( انه عبادة الله و اعمار الارض و تزكية النفس )

و قال اننا محتاجين نرجع للرؤية دى و نفهم ديننا صح و كل واحد يبدا ..و لو بدا هيلاقى ناس كتير جت معاه فهنتحرك كلنا باذن الله

و اتكلم عن اليابان و انها رغم انها ابيدت منها اجزاء تماما و اتدمرت لكن دلوقتى وصلت لايه ..و السبب ان كان عندهم اعتقاد انهم عايزين يوصلوا لشىء معين

فقال فمابالك لو عندك احسن اعتقاد ممكن اى انسان يعتقده ..اعتقادك كمسلم بتقول لا اله الا الله و عايز تطبق المنظومة الكاملة (عبادة الله و اعمار الارض و تزكية النفس )

اكيد هيوصل لاحسن حاجة

فاحنا محتاجين ننسى حب الدنيا المذموم اللى هو حبها لذاتها و اننا ننسى الاخرة و نحب الدنيا و نرضى بيها و نتمنى نوصلها عشان نوصلها هى نفسها مش عشان نرضى ربنا
فمحتاجين نغير دة و نعمر الارض و احنا بنعبد ربنا و بنحسن من نفسنا و علاقتنا بغيرنا حلوة

نمشى متكاملين كدة و نتحرك ..اكيد هنبقى احسن حاجة باذن الله

و نبقى متوكلين على الله مش على الاسباب ..نبقى بنعمل الاسباب علشان بس ربنا امرنا بيها ..لكن عارفين تماما ان ربنا هو اللى هيوصلنا ..

و اتكلم ان فى غزوة بدر كنا قليلين بس ربنا اكرمنا و نصرنا و فى غزوة حنين لما اعجبتنا كثرتنا كنا هنتهزم ..فالموضوع مش بالعدد ..ألمهم نعمل اللى علينا و احنا متوكلين على الله و لا نشرك به اى شىء (و الاسباب شىء ..منعتقدش انها هى اللى بتنجحنا )

فلازم نفعل ايماننا علشان ربنا ينصرنا بايماننا

دة تقريبا الملخص

سلااااااام عليكم و رحمة الله و بركاته

أشكرك جداً وجزاكِ الله خيراً لأني اتضايقت أوي إني معرفتش أشوفه للأسف مش علشان ملحقتش لكن علشان غبائي أنا جيت على الساعة 12 إلا ربع كدة لقيت الراجل اللي مش عارف يشوف إبنه ده كان على 12 وشوية كدة فقولت أنا مش طايق نفسي لأن النهاردة اليوم كان حر شوية وأنا كنت متقل فكان لازم أدخل آخد دش يفوقني ... خرجت على واحدة إلا ربع ... لقيت الاعلان شغال قولت كويس هيبدأ طلع بيخلص وده الإعلان اللي بيجي كل مرة .. قولت يعني م أنا اللي غبي .. حبكت يعني آخد دش دلوقتي ... ولا يكون أصلاً جه قبل 12 ولا إيه؟
ولا جه وقعد خمس دقايق بس؟ شكله مطولش زي المرة الوحيدة اللي شوفتها ساعة غزة تقريباً قبل الامتحانات
بس هو فعلاً قال في ساقية الصاوي إنه عايز يعمل كورس عن حاجة إسمها تزكية النفس إننا نوصل نتعامل بطريقة كويسة مع ربنا أو حاجة زي كدة علشان مألفش
بس شكراً تاني برضه وجزاكِ الله خير بكل حرف كتب أو سيكتب

ربنا يجزاكم كل خير علي الكلام الرائع ده
وربنا يجعلنا من الصالحين والمصلحين

امين يا رب العالمين

و هى تزكية النفس ..هو اتكلم عنها شوية قبل كدة فى حلقات

هو على حسب معلوماتى ..اصلا كل نفس ربنا خلقها فيها الخير و الشر ..بس ربنا قاللنا (قد افلح من زكاها و قد خاب من دساها )

ففى اللى بيحسن نفسه ..و يخليها كلها خير تقريبا و يخليها قريبه من ربنا و مع ربنا دايما .

و فى اللى بيسيب نفسه تضيع و تبعد عن ربنا

و تقريبا معز كان قال ان التزكية بتييجى مثلا بالذكر ..انك تقعد تذكر ربنا و قلبك حاسس بالذكر ..و انت بتصلى تبقىحاسس بكل كلمة بتقولها ..الواحد يدعى من قلبه

يعني هى زى عملية تحلية و تتطهير و تنقيه للقلب ..تخليه يبقى طاير كدة و متعلق دايما بالله عز و جل و بكل اللى يرضيه فتلاقيه حلو و اخلاقه حلوة مع كل الناس و فى كل حاجة

و تقريبا على ما اذكر انه كان يقصد ان فى ناس بتعمل العبادات ..بس شكليا بس ..لكن متلاقييش نفوسها النفوس الجميلة اللى اتعملها تزكية دى و لا بتعمر الارض

و فى ناس بتعمر الارض بس مبتعملش العبادات الظاهرة و لا بتزكى انفسها (زى الغرب)

و هكذا ممكن تلاقى واحد بيعمل حاجة واحدة او اتنين من التلاته بس ..فتلاقيه ميوصلش للمنظومة المتكامله دى

و تلاقى الغرب هما صح بيتقدموا بس عندهم فساد ديني و اخلاقى ..فده خسر اخرته ..و دى كارثه

و احنا عندنا تقريبا نفضنا لحتة تعمير الارض و ناس كتير فاكرة الدين عبادة و بس ..و الاخطر انهم شايفينها عبادة ظاهريه (بيصلى و يصوم بس قلبه مش حلو و مش عامل التزكية )

فهى دى المشكلة

اما لو واحد عمل ال3 حااجات (عبادة و تزكية و عمارة الارض)
هيبقىناجح فى الاخرة و فى الدنيا متقدم و مبسوط و سعيد و بيحب كل الناس و معاملته حلوة ليهم .

زى جيل الصحابة و التابعين واى عصر حلو من عصور المسلمين كان لانهم عندهم المنظومة دى .فكسبوا الدنيا و فتحوا بلاد كتير (ووصلنا لفترة اننا مكناش عارفين نودى اموال زكاة الفطر لمين فبقوا يحطوا طعام للطيور تاكل من اراضى المسلمين لانهم كان كلهم مرتاحين و حتى اهل الزمة من اليهود و النصارى كانوا جوزوهم و ادوهم فلوسو برضه فيه زيادة)

و فى نفس الوقت نلاقيهم باذن الله كسبوا الاخرة باعمالهم الصالحة

فلازم نكون كدة

و اى حد بيعمل ال3 حااجت بنلاقيه فعلا انسان ناجح ..ربنا يكرمنا و يرزقنا بكل دة

سلاااااام علييييييكم و رحمة الله و بركاته

ندى: شكراً على الشرح الوافي و جزاكِ الله خيراً ... ويارب نحاول نحافظ كلنا على المنظومة دي
ويارب نعمل اللي بنقوله ونقول اللي مصدقينه ونصدق الصح

شدية: جزانا وإياكم إن شاء الله

» ندوة في ساقيه الصاوي
» ندوة لمعز مسعود يوم 7-2
» مناقشات حول برنامج (صَدَقَ رسول الله) - الأستاذ عمرو خالد
» برنامج الطريق الصح لمعز مسعود
» ندوة عن ال icdl