مناقشات فى مادة الادارة الدولية

انتوا ايه رايكوا يا جماعه فى المادة

انا فى البداية كنت بقول شكلها مادة مش لذيذة .. و هنقعد ناخد رغى كتير بقى و نتعب

بس بجد دكتورة امل محاضرتها لذيذة جدااااااا و بتخلينا نفهم نقطة نقطة بكل ما فيها و نستوعبها تماما و نتناقش معاها

الحمد لله ان ربنا رزقنا بيها

و علشان نتآلف مع المادة اكتر ايه رايكوا برضه نتناقش مثلا دلوقتى ..فى ان كل واحد يقوللنا هو حاسس على مستواه الشخصى بان العولمة حاجة حلوة فى ايه و ووحشه ى ايه

(مزاياها و عيوبها من وجهة نظركم يعنى .. و لو تخيلنا انها مش موجودة هل كانت هتبقى الحياة احلى ولا اوحش ؟؟)

اسئلة كثيرة تجمع نفسها ..يلا مستنية مناقشتكم


سلااااااام عليكم و رحمة الله و بركاته

والله هو أنا مش بعرف أكتب حاجة خالص ورا الدكتورة دي ... إلا لما بتملي بالفعل .. بس حاسس المنهج مفكك .. لكن فيما يتعلق بالمحاضرة فهي لما حد بيجرها لحاجة تانية وكلام غير المنهج ممكن يكون ليه علاقة أو هي تقول حاجة تانية بتروح معاها كتير وتطول فيها ولما نرد عليها تقفل ومترضاش تتناقش وبعدها ترجع تاني ... مش بتعترف بإن حد بيقول حد قال حاجة صح .. كذا واحد النهاردة جابوا على المعايير أو المحددات التي تؤثر على الثقافة وكدة وهي مكانتش بتركز معاهم

يا جماعة عايزين المحاضرات على النت لان انا مش هاقدر اصورها .وجزاكم الله خير

يا جماعة هو انتو مش هتنزلو المحاضرات بقى
يعني نشتريها من سلمى الخايبة واللا اييية
ياريت تنجزو يعني عشان نعمل اي منظر الترم ده

يا جماعة صباح التنفيض يعني امشي ومجيش تاني
هوانتو عاملين المنتدى ده ليكو بس
تتكلمو مع بعض في حاجات انتو بس اللي عاوزين تتكلمو فيها
وساعة لما الواحد يكلمكو في حاجة تنفضولو
ماشي يا جماعة بس بجد كدة انتو بتزعلو الناس منكو

سلاااااااااااااااااااااااااااااااااااااااااام

بسم الله الرحمن الرحيم

ارجوك ارجوك ..ممكن بس بشويش شوية
احنا زمايلك و زيك بالظبط يعنى ..مش شغالين خدمه عملاء و فاتحين 24 ساعه و عاملين ورديات

و قسم ادارة اعمال انا حاليا بس اللى شغاله فيه و انا اللى بنزل المحاضرات
فممكن بس تصبر عليا شوية
انا رديت على حضرتك ف ى موضوع تانى لانك كنت مشتكى فى كذا موضوع عن عدم وجود محاضرات و قلتلك انى اسفه و كنت شغوله بالنتيجة

و باذن الله فعلا هبدا شغل .. بس اسفة ارجوك استحملنى ..انا زيك بروح الكلية و بنام و بصحى و بيطلعل نتيجة و بزعل عليها

بجد شىء يسعدنى انك عايز المحاضرات و مستعديه اصورلك اللى عندى و ابعتهملك لغايت عندك فى المدرج (مع انى معرفش بصراحة حضرتك مين )
بس ارجوك بشويش شوية

معلش انا بعتذر بجد ..بس للاسف الفترة اللى فاتت حصلى كذا مشكلة و الوسائل اللى برفع بيها بايظة و بحاول اشوف حل تانى

فاسفة بجد

ومؤقتا لو بكرة تحب اصورلك اللى مبيضاهم عندى ميش مشكلة

و دعواتك ربنا يقوينى و اكمل

و بجد بعتذر لك و لكل قسم اادارة اسففففففففففففففه جدااااااااااااا على تاخيرى الفظيع دة يا جماعه

و ارجوا دعائكم

http://www.wtoarab.org/Default.aspx?&lang=ar
أظن قصدك ده ؟ بتاع منظمة التجارة العالمية؟ ولا إيه؟

ramzy كتب:

يا جماعة صباح التنفيض يعني امشي ومجيش تاني
هوانتو عاملين المنتدى ده ليكو بس
تتكلمو مع بعض في حاجات انتو بس اللي عاوزين تتكلمو فيها
وساعة لما الواحد يكلمكو في حاجة تنفضولو
ماشي يا جماعة بس بجد كدة انتو بتزعلو الناس منكو

السلام عليكم
هو يمكن مش من حقي أرد ... لأني مش معني بالحكاية أوي لكن إحقاقاً للحق لازم أقول كلمتين مهمين
هي الفكرة إن الناس كلها مش عندها نفس الظروف أو الاهتمامات ومحدش يعرف إيه ظروف التاني؟
وندى كانت قالت قبل كدة إن عندها الاسكانر مش شغالة دلوقتي وفيه شوية مشاكل كدة وكمان كان الوقت أيام النتيجة مسيمحش ... ده غير إن مفيش غيرها زي م هي قالت في إدارة هي اللي بترفع المحاضرات وطبعاً محدش بيجبرها على كدة وكمان هي مش ملزمة إنها كانت بتعملنا ملخصات قبل الامتحانات كل ده ربنا يكرمها عليه ويجازيها بيها إن شاء الله ... بس أنا لو كنت أقدر أساعد كنت عملت كدة .. لأني معنديش اسكانر للأسف وكمان مش كل المحاضرات عندي .. لكن يعتبر عندي أغلبهم لو حضرتك تحب تصورهم مني مؤقتاً لو مستعجل .. لأني أنا كمان كنت عايز أكمل المحاضرات دي وكنت برضه مستني بس مقدر الظروف وعارف الحكاية أو على الأقل بلتمس أعذار
أقل حاجة مقابل المجهود الخرافي اللي بتعمله بالإضافة للحاجات اللي هي بتعملها برضه و وهي كمان مشرفة في المنتدى فدي مسئولية ... ربنا يعينها في اللي بتعمله ... ويكرمها وإن شاء الله قريب كل حاجة تتظبط
بس لو سمحت من غير م حد يتضايق من حد . وآسف إني بتكلم وأنا مليش أي سلطة لكن مكانش ينفع أسكت وعارف إنك ممكن تكون عايز تقولي ( وإنت مالك؟ ) لكن هتقبلها لأني مش عليا الحمل بتاع إني مطالب بالمحاضرات دي
ربنا يهدي الجميع ويوفقنا ويكرمنا
وآسف على كلامي لو ممكن يكون ضايقك

يااا سيد رمزي

اعتقد انك بتتكلم مع زمايلك في القسم ورفع المحاضرات ده عمل تطوعي مش اجبار تجزى عليه ندى خيرا فاعتقد الاسلوب المفروض يكون احسن من كدة ع الاقل

وانا بأيدك يا حنظلة في الكلام ده يا رمزي اهدي انت بتكلم بنت ومش اي بنت دي شايلة الدفعة كلها الترم الاول لوحدها ربنا يكرمها ويجازيها خير ووالله قل لي انت عايز ايه وانا اجيبهولك لحد عندك محبة في الله وهتمامك بالعلم وربنا يوفقك يا رمزي وده رقمي 0111938855

بجد شكرااااااا اوى او ليكوا كلكوا (سمير و محمود و احمد ) ربنا يكرمكوا على الدفاع دة

بس عادى حصل خير ..اكيد هو ميقصدش يتخانق يعني ان شاء الله

و انا خلاص جربت موبايل اخويا طلع صورته كويسة و هبقى ارفعهم بيه بقى ان شاء الله (اخر التطورات انى اصورلكوا المحاضرات بالموبايل )
و الله كنت جربت بتاعى قبل كدة و لقيته للاسف مش بيطلع الكلام واضح

و ان شاء الله استنوها قريب

و مفيش زعل ان شاء الله ..كلنا اخوات

بس دعواتكوا ميحصلش مشاكل تانى بقى

دي أقل حاجة والله ... ومهما قولنا أو عملنا أكيد مش هنقدر نوفي حقك ولا أفضالك على إدارة ومحاسبة كمان وكلية تجارة كلها
ودي حاجة لا تذكر ولا تتساوى وخدماتك الجليلة ومجهوداتك الجبارة
ياريت نكون بس بنعرف نقف دفاع ... وإن شاء الله ميكونش فيه هجوم ولا حاجة وميكونش فيه زعل ولا مشاكل ولا سوء تفاهم ... يارب
قريب إن شاء الله هكلمهم يدولك وسام ( الجندي المعروف) لأن طبعاً كلنا بندعيلك إن شاء الله ربنا يجزيكي خير بنيتك في المساعدات والأعمال الحقيقة الجبارة دي
ربنا يوفقك ويوفق الجميع

عليه افضل الصلاة و اتم السلام

و بجد شكرا اوى عل كل التشجيع و الكلام دة

و معلش عارفه انى وحشة ..بس اسفة اخويا مكانش فاضى و انا مش عندى البرنامج اللى بعمل بيه المحاضرات ف ملفات pdf علشان كمبيوترنا كان باظ و لسة متصلح فالبرامج مش موجودة علشان كلها اتمسحت

اخر محاضره للدكتوره عجبتنى بجد اوى ربنا يكرمها

هيا اتكلمت تقريبا على بناطيل الولاد وانها بتبقى مدلدله وكده
هوا اصل التقليعه دى ان فى السجون الامريكيه بيشيلوا الاساتك او الاحزمه من البناطيل بتاعت المساجين عشان مايستخدموهاش فى اعمال عنف سواء مع ناس تانيه او انهم يأذوا بيه نفسهم او ينتحروا وكده يعنى فاصبحت العلامه او السمه المميزه ليهم هيا ان بناطيلهم مدلدله فأصبح البنطلون المدلدل هوا علامه على القوه والبلطجه والخطوره والشباب الحمد لله خدوا التقليعه دى وهما مايعرفوش عنها حاجه فى حين انها بطلت هناك اصلا

بجد ..سبحان الله ..حاجة تضحك و الله

بجد بيبقى شكلهم مقرف اوى ..و لا الشعر المنكوش لفوق دة كمان مش عارفه بيوقفوه بايه بالطريقة البشعه دى

و مش بس الولاد طبعا البنات لو اتكلمنا مش هنخلص ..ربنا يهدينا كلنا

بس انا كنت معترضه مع الدكتورة على حكاية 500 سنة عشان يتغيروا

و قلتلها بس للاسف مقدرتش اقعد اتناقش ..اصل التغيير صح عايز وقت و صبر

بس مش للدرجادى


النبي صلى الله عليه و سلم ربنا ارسله و غير بيه حال كل العرب فى خلال 23 سنة بس

و طبعا 23 سنة مش حاجةقليله برضه و عايزة صبرررر ..بس لازم نحاول و نحاول نتغير و نغير الىى حوالينا و الانسان مجرد ما بيبدا يسعى ربنا بيكرمه و يتغير

و كمان لازم نحاول نشترى المنتجات المصرية ما دام موجودة عشان نحاول نشجعهها

دول بس النقطتين اللى اختلف فيهم

يا جماعه

فى سكشن الساعه 2 النهاردة ان شاء الله

انا قلت اقولكوا احتياطى برضه يكون حد حابب يحضر

انا قلت اقضى وقت الفراغ بين لمحاضرات و السكشن فى بيتنا احسن

هيا مش قصدها 500 سنه 500 سنه يعنى هيا ممكن تكون كانت بتبالغ بس
بس احنا فعلا فى مشكله كبيره ومحتاجين وقت وشغل جامد اويى عشان نبقى احسن وطريقه التفكير والثقافه تتغير شويه يعنى مش هقولك الحكومه وكده والكلام ده شوفى مثلا عندنا فى المدرج الطالب معندوش استعداد انه يسمع استاذه مابالك بقى بنا وبين بعض لكى ان تتخيلى الى بيحصل

وبمناسبه الصناعه المصريه كنت نزلت مع واحد صحبى بيشترى حاجه للكومبيوتر بتاعه فا واحنا بندور كده لاينا سماعات صب تحفه وصناعه مصريه ففرحت اوى يمكن السنه الجايه كده ولا حاجه نلاقى مزربورد ولا بروسيسور صناعه مصريه

السلام عليكم ورحمة الله وبركاته

الكدتورة دي شكله مش هاترتاح غير لما تعمل فيا زي معمل الدكتر حسين عطا (ربنا يهديه ويصلحله حاله)
بمعد كل محاضرة احضرها لازم تغلس عليا وانا مش فاهم ليه
ياللا اهو اخر تيرم ويخلص (إن شاء الله)ولو بمقبول

السلام عليكم ورحمة الله وبركاته

السلام عليكم انا عنى اقتراح بسيط وارجو ان لا اكون تدخلت فى ما لا يعنينى انا عندى جزء كبير من المحاضرات متبيض فلو احد يريد ان يصوره منى فلا توجد مشكلة على الاطلاق وذلك حتى تتاح المحاضرات على النت من اختنا ندى وارجو منكم ان تعلموا اننا اخوه وهذا عشم بيننا فلا احد يزعل منالاخر كلنا اخوة والسلام عليكم ورحمة الله وبركاته

ربنا يجازي حضرتك كل خير و شكرا جدا على المساعدة دى

و انا بعتذر بجد تانى يا جماعه

انا اسفة الترم دة الدنيا متلخبطة شوية و جدتى تعبانه اوى اليومين دول ..أرجوا تدعولها ربنا يشفيها لانها فى العناية المركزة

يا رب تخف يا رب