صفحة جديدة باذن الله (بخصوص الموضوع اللى نزل امبارح)

السلام عليكم و رحمة الله و بركاته


امبارح نزل موضوع و حصل عليه مشاكل كتير

و بصراحة انا من اول المعترضين عليه ..جايز كان مقصود بيه خير بس الاسلوب كدة اعتقد ما ينفعش

اولا بالنسبة للمواقف اللى فى الموضوع

انا شايفة بس انه كبير شوية

اى حد مننا لما بيلاقى واحد كبير واقف وواحد صغير بيقعد الكبير
مش لان الصغير وحش و الكبير حلو
انا لو شفت واحدة كبيرة و مش محجبة و شكلها تعبان هقعدها و مش هقعد بنت ملتزمة بالحجاب كويس و صغيرة (الا ل شكلها تعبان اكتر)

لان دى اخلاقيات تعامل مع البشر ..النبى قدوتنا رحمة للعالمين كلهم و احنا بنقتدى بيه فلازم نبقى رحمة للعالمين كلهم

طبعااااا بنحب اللى قريب من ربنا اكتر ..بس الغلطان مبنكرههوش او نعامله وحش و بنحب له الخير و نتمنى له الهداية

دى اول نقطة


تانى موقف :
اعتقد الناس دى كانت تشكرك فى اى حال و هتتبسط من فعلك اكيد


هى الحكاية كلها ان الدين فيه جوانب كتيرة اوى ..علشن تبقى مسلم كويس لازم تبقى حلو من جواك و من برة و تكون اخلاقك و معاملتك حلوة للناس و تكون بتشتغل و ليك دور فى الحياة


طبعاااا مفيش انسان كامل

بس هل لو لقينا انسان فيه حاجة حلوة و مقصر في غيرها نحكم عليه انه وحش

و ليه مبنفكرش ان احنا برضه مقصرين فى حاجات

و ليه نفترض سوء النية من الشخص ..احتمال كبيير يكون اللى عمل الموقف الاول كان بس وجهة نظره انه الراجل كبير و اكيد تعبان (ملحوظة التعبان ممكن يكون مش باين عليه ..بس غالبا الكبار صحتههم اقل من الشباب )

فليه تفترض انه شافك وحش فمقعدكش


حاجة كمان

انا عارفة ان فى ناس صح ملتزمين بالسنة اللى فى الشكل (و دى طبعا مهمه اننا نقتدى بحبيبنا فى كل حاجة ..و ان كانت مهم برضه اكتر نهتم بالسنن الجميلة ف المعاملات )

الناس لو افترضنا ملتزم بالسنة فى الشكل و بيعملوا حاجات مش صح

هل بسبب وجود معاملات وحشة لناس نقول ان الشكل دة غلط؟؟

طبعا اللحي لازم تكون مهذبه و يتهم ان يكون شكلها حلو و سمعت ان النبي صلى الله عليه و سلم كان بيحنيها و يحطلها حاجات يعني تخليها تبقى شكلها حلو

و كمان هى بتدى شكل للرجولة و مش بتوحش و لا حاجة فى احوال كتير لما تكون معموله بشكل كويس و مهتم بيها لان مهم و سنة برضه النظافة و المحافظة على حسن المظهر

بس المهم هل الناس دى لو بتعمل حاجة وحشة احنا نعترض اعوذ بالله على السنة

طب مثلا برضه و دة على حاجة فرض
بنات كتير من اللى بتلبس اسدال بتكون بتهزر مع ولاد و ممكن حاطة ميك اب فى وشها ..

هل نيجي و نقول اللبس دة وحش

لا طبعا دة حلو و احسن حاجة و ربنا يهدينا يا رب جميعا و نلتزم باللبس الصح تماما

فمش معنى سلوك حد غلط و بيعمل حاجة صح ان الحاجة الصح غلط

لازم نعمل فصل


و اشمعنى بنزعل من الغرب لما يقولوا على الاسلام دين عنف اعوذ بالله بسبب اعال بعض المتطرفين و اللى خرجوا عن منهج الاسلام بس مسلمين
و بنقولهم لا احنا بريئين من الافعال دى

فلازم برضه نقول ان الالتزام بالسنة برىء من اخلاقيات بعض الملتزمين بيه


------------

طبعااا اكيد الموضوع مكانش مقصود بيه حاجة وحشة و غالبا حسب ما فهمت ان غرضه ا الاخلاقيات مهمه و اننا نبص لقلوب الناس و مش بس لشكلها

دة طبعا شىء جميل

بس يا ريت كان يبقى الاسلوب مختلف

و ربنا يكرمكم جميعا و يا رب متعملوش خناقات ابدا و كلكوا تحسنوا النية ببعض

و اهم حاجة تصلحوا ما بينكوا و بين بعض ..عشان اهم حاجة اصلاح ذات البين ..لازم تحافظوا على عدم وجود اى خناق بينكم و ربنا يكرمكم
و السلام عليكم و رحمة الله و بركاته

اكيد كلامك صح بس هو اية الموضوع الى زعلك كدة يعنى الا انا فهمتة انت شوفتى حاجة فى الموصلات اواسلوب فى التعامل بين الناس مش كويس وعلى مااعتقد انة بسبب اختلاف الديانات يعنى فهمى صح او خطأ واكيد عندك حق انا بردة بشوف ان الواحد المفروض ميفرضش على غيرة اى حاجة يعنى كل واحد برحتة المفروض الناس تحترم بعضها لمجرد الاحترام مش لازم اكون اعرفة المفروض ان الصغير يحترم الاكبر منة بصرف النظر عن اى شى اخر
وانا شايف ان لو كل واحد احترم الاخر وحتى احترم نفسة هيكون دة افضل للمجتمع ككل
ومش هنشوف ونسمع الى احنا بنسمعة من الفاظ خارجة فى الشوارع او الموصلات
ويارب الشارع المصرى حالة يكون احسن من كدة

انا قسمت الرد تغير للملل



والفاصل كبير بين الكلام لانى كتبته على الورد وبعدين نقلته





وللاسف الشديد برضه

انه مكن يكون جواه شعور كره العصاه نفسهم


وده يخلى الناس تضايق منه

بس هو من جواه بيكون مش بيكرهم هو بيكره وضعهم وخصوصا انه بيفكره بوضعه السابق



فرؤيه مثلا اتسان عاصى(مااقصدكش طبعا ) ممكن ترسم على وجهه علامات الغضب مش

لانه مضايق من الانسان ده لا لانه مضايق من الفعل وحاسس بشفقه على الانسان المذنب



ومش عايزه يوصل للحاله اللى هو وصلها



هو بس بيبقى عايز حد يتعامل معاها بطريقه معينه



ومعرفش ليه دايما بحس انه الانسان الملتزم جديد مش اى حد يتعامل معاه



لازم حد يكون عارفه وفاهمه



انا عارفه انى رغيييييييييييت جامد



بس صدقونى الكلام اللى قولته حقيقى



لانة عايشه طول عمرى مع والدى وهو ملتحى ومتعودين عليه بلحيته



اللى بتضفى على وجهه نور وجمال ووقار



(وبجد تعالوا شوفوا الناس بتحب بابا ازاى وعلاقتنا بجرانا النصارى حتى
عامله ازاى بيحبوا بابا جدا ولما عمل العمليه ناس بتوع شركه من الشركات اللى بيتعامل معاه هما نصارى
بس جم مخصوص من القاهر لللبيت علشان يجببوله هديه وبابا كان عامل العمليه فى القاهره كان ممكن يروحوله المستشفى بس جم لغايه البيت حبا فى بابا ,تخيلوا بقى مش كل الملتحين تعاملاتهم مش كويسه !!)



وفى نفس الوقت شوفت فى الحياه فى عيلتنا حد التزم جديد وتعاملته قبل التزامه بالدين ازاى
وبعد فتره ايه اللى حصل معاه



وازاى الشده قلبت لين


بعد ما كن دايما هزار قبل الالتزام وبعيد وعايش زى اللى عايش من غير هدف

ولما ربنا هداه



واتغير للاحسن اكيييييييد



بس فى الاول كان شبه بطل يضحك اساسا فى وشه اهله كان الضحك حرام



مع انهم مش متعوديين منه على كده


ودلوقتى بقى عادى جداااااااا انسان مسلم طبيعى بيضحك ويهزر وفى نفس الوقت الاسلام
الاول فى حياته (ولا نزكى على الله احداً)



فدايما احسن الظن بييهم واحنا معاك لان مش كلنا بنحسن الظن ببعض


وكلنا بتجيلنا هفوات لالاننا بنى ادمين مش ملايكه


والسلام عليكم ورحمه الله وبركاته

السلام عليكم ورحمة الله وبركاته
مش عارف أقول إيه الصراحة . ؟ خاب ظني في أن يفهمني أحدكم الفهم الصحيح
ولكن الجميع افترضوا أنني تسرعت فيما كتب وحكمت مسبقاً لمجرد المظاهر ثم صححوا ذلك بأنه من المؤكد أن نيتي كانت حسنة
أرأيتم بأعينكم التناقض الذي وقعتم فيه؟
كان هذا ببساطة هو مدلول العنوان أما المحتوى فكان شرحاً لشقي العنوان ... كنت أظن أن هناك من فهم ومن التبس عليه الأمر ... ولكن لم يحدث لا هذا ولا ذاك
فأشكر ما قلتموه ... وهذا لن يثنيني عما سأكتب ولكن يشوب كلامي صبغة الحزن
فلهذا الموضوع طريقين للرد .. لأني أعتقد أنه من حقي على الأقل أن أدافع عما قلت أو عن نفسي وإن لم أكن متهماً فمجرد أنني لم ألمس التفهم لجوانب الأمر في كلامكم يشعرني بأنني مخطئ
لا أنفي كوني مخطئاً ولكن ليس فيما كتبتم
لا أدَّعي أنكم فهمتموني خطأً ولكن ألوم نفسي أنكم لم تفهمونني الفهم الصحيح الذي أردته
فالطريق الأسهل هو ( أن أعتذر عما فعلت و أصمت وأكتم ما بي )
والطريق الأطول هو ( أن أعتذر أيضاً ولكن عما فعتلم أنتم بي ... ) لا أجعل الدائرة تدور عليكم ولكني في موقف كان يحتاج مني عدم الانتظار حتى تقرروا ما اقتتنعتم به
وأن تتهموني بما اتهمتوني به وقد وقعت فيه من عدم فهمي فهماً صحيحاً ورغم كل هذا كلٌ افترض أبعاداً مختلفة وبعيدة كل البعد عن أصل الموضوع وأنشد في أدلته على أنني ارتكبت حمقاً لا مردَّ له
عذراً لسوء ما كتبت يبدوا لأنها كانت بالعامية التي لم أعتد كتابتها سوى في المدونة
ولكن يفصلنا الرد ... وهذا بالغد إن قدر الله لي أن أحيا إلى هذا الوقت
أستودعكم الله .. وجزاكم الله خيراً

رد فداء رائع


وآسف ان بعض الناس كان اسلوبهم مش حلو في الرد



لو كان الرد زي ما فداء ردت ، ما كانش حصل كل ده


ووالد فداء أكبر مثال علي كده


وقصة زيارة النصاري له


لكن للاسف فيه ناس متشددة اوي


وعلي فكرة

مش عيب ان حد فينا يغلط

لكن العيب انه يتمادي في غلطه

والعيب الاكبر انه يواجه بالعنف ده


هو اسم الموضوع ممكن يكون كان فيه غلط كبير


بس الغلط ده ما جاوزش الخطوط الحمراء


احنا مش قدام الرسوم المسيئة

احنا قدام عنوان مكون من شيخ فاسد

حتي مش محدد مين الشيخ ده


بس للاشف فعلا فيه ناس متشددين اوي

واسلوبهم في الكلام بينفر الناس منها

حتي لو كان الشخص المخطئ عامل الموضوع علشان يلاقي كلام لين ، يجذبه تجاه الحق

فبمجرد انه يلاقي كلام عنيف كده ، بيندم عاليوم اللي فكر يكلم الشخص المتشدد ده


الغريق بيتعلق بقشاية


عموما حصل خير


ويا ريت اسلوبنا يبقي مهذب


واقوالنا مسنودة بأحاديث وآيات قرآنية


وعلي فكرة

انا ممكن اعمل موضوع برضه ممكن يكون اسمه قريب من اسم الموضوع القديم

وده عن موقف حصل مع شيخ في الحرم المكي

ذهبت له سيدة لم يتحدث معها ولم يفتها ولم يعيرها اي اهتمام اصلا ، بل تركها

وذلك كله لأنها ليست منقبة

في حين انه كان يتحدث مع سيدة قبلها وكانت تحكي له وتستفتيه في انها قتلت شخص خطأ


ورد عليها وذلك لأنها كانت منتقبة


فماذا يقال علي ذلك الشيخ

وعلي حد علمي البسيط ، ان المفروض السيدات المنتقبات تكشف وجهها في الحرم المكي


فايه قول الناس


ثانيا بالنسبة للموضوع اللي اتقفل برضه

كان فيه ردود عليا

طبعا خليتني افكر

وقفت في البلكونة وقعدت افكر في المشكلة اللي حصلت دي

ولقيت شيخ أزهري ( تقريبا ) وهو رجل كبير في السن

يمر من امام منزلنا وهو يلبس الجلباب والقفطان والعبائة

وهو زي طويل

وهذا زي الازهر

وتذكرت غيره من الشيوخ المحترمين الاجلاء

فهل هم مخطئون؟


ولكن فداء وضحت بكلام الشيخ المحترم والعالم الجليل دكتور عمر عبد الكافي ، حينما ذكرت رأيه



وبكده اكون قولت اللي عندي

ويا رب يبقي فيه اسلوب هادي في الحوار

احنا في ساحة اختلافنا ميزة

واحنا بنتناقش في موضوع لم نتجاوز فيها الخطوط الحمراء


وربنا يكرمكم كلكم

ويهدينا كلنا ويهدي المتعصبين

السلام عليكم ورحمة الله وبركاته

اولا انا مش عايزك تزعل مني ولا حنظلة كمان

لاني انا مش زي ما انت متخيل (اقصد متشدد)

وانما انا زي زيك ان لم تكن اكرم عند الله مني

كدة كدة انا مش متعود ار على اي اهانة لي من اي احد

واسال الناس اللي معانا في المدرج

بس الموضوع استفزني

عموما ارجو ممن اخطات في حقه ان يسامحني ويدعو الله لي

السلام عليكم ورحمة الله وبركاته

صلوا على النبي

النهاردة الجمعه

و يا رب محدش يكون زعلان من حد

----
اللهم صلى و سلم و بارك على سيدنا محمد و على اله و صحبه و كل من تبعه

قال رسول الله(ما كان اللين في شيء الا زانه ومانقص من شيء الا شانه) وعموما احنا اخوات وصلوا علي النبي ولا تنسوا قراءة سورة الكهف

اقتباس :

رد فداء رائع

الله يخليك يارب

اقتباس :

لو كان الرد زي ما فداء ردت ، ما كانش حصل كل ده

بس بصراحه من الحاجات اللى خلتنى ارد كده

انى اساسا ماشوفتش الموضوع نفسه بالعنوان فىساعتها ولا شوفت الاختلافات اللى حصلت

انا كل عرفته

ان الموضوع اسمه شيخ فاسد

ووصلنى كوبى لكلام حنظله

وعلى فكره ولو كان حنظله عمل عنوان تانى

تلت تربع المشكله دى كلها مكنتش هتحصل

لانه بالعنوان دخل على طول على عقول الاعضاء بسوء الظن والعنوان ملفت جدا


بس انت يا حنظله ما وضحتش وجه نظرم من تسميه الموضوع كده

وانت قولت انك هتقول سميته كده ليه ؟؟؟؟؟

واحنا متعودناش منك تزعل بسرعه كده

ويمكن فعلا لو كنت كتبت الكلام بالفصحى كان هيطلع احلى

لانك ما شاء الله اللغه عندك جميللله وعندك مصطلحات لغويه لا بأس بها ابداً

ويمكن لو كنت ركزت شويه فى العنوان كنت هتاخد بالك

ان صفه شيخ فى انسان تنفى كونه فاسد وصفه فاسد تنفى كونه شيخ

فانك تجمع الاتنين على بعض حاجه غريبه جدا

فمتزعلش من اى حد مننا لو كان حد فينا اساء ليك باى طريقه او اتعصب عليك

وحاول تحط نفسك مكانا وتتخيل لو عنوان استفزك ممكن تتعصب

كلنا بشر


بس برضه انت قولت ان كلنا فهمناك غلط وبجد بجد

نفسى اعرف انت تقصد ايه من كلامك طالما ان كلنا فهمناك غلط

ومره تانيه

احنا اخوه واخوات فى الله وبنقولك

آسفين لو ضايقناك

وسلام عليكم

هو اسم الموضوع ممكن يكون كان فيه غلط كبير
بس الغلط ده ما جاوزش الخطوط الحمراء
احنا مش قدام الرسوم المسيئة
احنا قدام عنوان مكون من شيخ فاسد
حتي مش محدد مين الشيخ ده
*********************
معلش ليا تعقيب بسيط

ياريت منقارنش اللي حصل بدينمارك باي فعل نعمله
عشان في فرق كبير قوي قوي
بظرف النظر علي موضوع انا بتكلم علي شيئ تاني


احنا مسلمن مفروض نكبر اسلامنا ونظظهر محاسنه او كل حاجه عنه عشالن هوا اصلا كله حاجات كويسه
ففعل الغرب هما ميعروفوش مين رسولنا الكريم عليه الصلاة والسلام وده تقصير مننا جدااااااااااا
وعشان كده مفروض كلنا ننزل شيئ يرفعنا مش ينزلها
لو حد كان شكله مسئ للاسلام
فاستر عليه ومتظهروش
ونكبر امثال كويسه احسن

حنظله من ناس اللي موهبة كتابه عندها حلوة كده
طيب ما نستفيد منها في شيئ ينفع اصلامنا ونرفع من قدره حتي لو حد مش من الغرب بس علي ديانه تانيه لما يلاقي مسلمين بيقولو كده علي شيوخ اومال هما هيعملو ايه

ده راي
بدل
مانساعد في هدم باقاياالصورة موجوده نحاول ننررممها

ياجماعه ياريت نرفع اسلامنا ونكبره

لن أرد بأي كلمة حتى لا يتفاقم الوضع أكثر من هذا
كفانا تأويل أرجوكم
وأرجو أن تقرأوا موضوع الاعتذار

اللهم اغفر لي خطيئتي وجهلي وإسرافي في أمري وما أنت أعلمُ به مني
اللهم اغفر لي جدّي وهزلي وخطئي وعمدي
اللهم اغفر لي ما قدمتُ وما أخرتُ وما أسررتُ وما أعلنتُ
وما أنت أعلمُ به مني ، أنت المقدمُ وأنت المؤخرُ وأنت على كل شئ قدير

اللهم امني وجميعا يااااااااااارب
وانا بتناقش مع هشام مش عليك خالص علي فكرة عشان محدش يفهم كلامي عليه


وموضوع وانتهي واكييد كلنا غلطنا اخطاء وخلاص والحمد الله لقيت اللي يصلحهالي
ربنا يكرمكو ويارب نكون كلنا نصح لبعض لان ده من واجبات الاسلام بتاعنا





وها مين هينزل موضوع يجمع منتدي كده تاني

بس ماليش دعوة لو حصل فيه اي حاجه

اجمال لكل الاعضاء اللى ردو

الكلام جميل وانا دايما اتعودت هنا اننا نختلف وناس تزعل وفى الاخر نقول حصل خير

طيب وبعدين امتى هانتعلم اننا نناقش ونتكلم مع بعض

ومش مجرد موضوع نزل وعمل قلق يبقى يتشال ونرمى كل حاجة من غير ما نعالج

والفساد موجود فى التفكير مش فى الواقع اللى احنا عايشينه

سبحان الله احنا بقينا بنعتذر للناس الغلطانة هههههههههه

حاجة غريبة

ربنا يصبرنى بجد وطالما الناس اتصافت يبقى الحمد لله

بس ده يكون من القلب مش مجرد كلام

الله يخليكوا و يكرمكوا و يبارك فيكم

ممكن تقفلوا الموضوع

يا جماعه اكيد حنظلة قال الكلام دة مش من هوا

فعلا فى ناس للاسف كتيييير بيسيئوا للاسلام بمعاملاتهم السيئة

و هو قال يقال عليه شيخ

و انا فعلا ضد ان يتقال على كل واحد بدقن شيخ ..لان مش كل واحد بيربيها سنة و مش كل من ربى دقنه بقى عالم و فقيه و الناس تروح تستفتيه و دة بيحصل و موجود فى ثقافه ناس كتير للاسف

ممكن انسان كويس بس بسيط و من عامة المسلمين و ربى دقنه و فجاة الناس تعتبره شيخ

المشكلة و اللى اعتقد ان دة سبب نزول موضوع حنظله عشانها

هى ان اعتبار المصريين لاى شخص ملتزم شكليا بانه شيخ او شيخة
ان دة بيخيلى الناس عايزة تقتدى بيهم فى كل حاجة
و ممكن الواحد دة هو زيه زي اى بنى ادم خطاء ..و اكيد هو لانه مؤمن و كويس بيستغفر ربنا و يتوب
بس المشكلة ان الناس بتعتبر انه مينفعش تطلع منه حاجة غلط و ممكن تتبعه فى حاجة غلط

زى ان مثلا يكون بيتكلم و هو مكشر
جايز الرجال متضايق و لا مخنوق ساعتها
بس هما يفتكروا ان اعوذ بالله اعوذ بالله التكشير من الدين ..مع ان الابتسامة صدقه

فهى دى فى راي ملخص المشكلة

انن لازم نبص لقلب الناس و مش بس نهتم باشكالهم
طبعاااااا الشكل مهم ..ب القلب اهم و اهم
و اللى بيتصلح قلبه باذن الله يتصلح كل حاله

فمهم جدااااا نحاول نبص للقلوب

طب و نشوفهها ازاى ؟؟

نحسن الظن و نحب الناس ..هنبص للخير اللى فيهم

دكتور وائل امبارح قال تفسير عجبنى اوى

(( و نفس و ما سواها ..فألهمها فجورها و تقواها .. قد افلح من زكاها ..و قد خاب من دساها ))

عجبنى اوى انه قال قد افلح من زكاها مش بس تزكى نفسك

انت بتزكى النفوس عموما

انت اللى بتقدر تطلع الخير اللى جوة الواحد ان شاء الله او تطلع الشر اللى فيه


كل الناس فيهم حاجات حلوة

يا ريت كلنا نبصلها


و متهيالى كفايه كدة

و صلوا على النبى و حصل خير ان شاء الله

و سلااااااام علييكم و رحمة الله و بركاته

وعليكم السلام ورحمة الله وبركاته
اللهم صلي على سيدنا محمد وعلى آله وصحبه وسلم

ربنا يكرمك وإن شاء الله خلاص الموضوع اتحل ومفيش حد يكون متضايق
ويارب محدش يزعل مني ولو حد زعلان يقول
شكراً لكل الناس ويارب يكرمكم
وكلامك لا غبار عليه
والتفسير اللي كان قاله دكتور وائل انتي كنتي كتبتيه في موضوع إنسان قبل كدة فلما قاله افتكرت الرد .. ربنا يكرمك برضه لأنك كويس إنك تكوني عارفة الكلام ده ومتكتميهوش عن حد
ربنا يهدي الجميع و يجمل أخلاقنا يارب

امين يا رب العالمين

سبحان الله

يا جماعة الوضوع انتهي وانا بعت رسالة اعتذار للاستاذ سمير والانسة ندي وحقكم عليا

جزاك الله خيرا يا احمد انت شخص محترم

واحنا اخوات مفيش اى مشاكل وربنا يديم المحبة والمعروف

والله وحشني يا بروف انا ماشفتكش غير مرة واحدة واتمني اشوفك يوم الاثنين

ربنا يكرمك ..حضرتك بتعتذر على ايه بس

دة يا ريت كل الناس اللى ردت ردت زيك

ربنا يجازيك كل خير

واياكم وجزاكي الله خيرا علي ذوقك

الحمد لله على حالة الهدوء والسكينة اللى موجودة دلوقتى

شوفت بقى ... لما بطلع منها الموضوع بيهدى
رغم إني بحب أهدي النفوس والله
تحبوا أنزل موضوع تاني بس بعيد بقى عن الشيوخ المرة دي
يبقى إسمه مثلاً
لماذا لا نرى الله؟
لكن من وجهة نظر إلحادية مثلاً ؟؟