ملتقى توظيف سيتي ستارز مدينة نصر

السلام عليكم ورحمة الله وبركاته


ازيكم يا شباب

في ملتقى توظيف بكره إن شاء الله في فندق سيتي ستارز في مدينة نصر

كله يجهز نفسه ويروح من بدري

تقريبا الملتقى كان النهارضه وتاني واخر يوم ليه بكره إن شاء الله

طـــــــــــــــــــيب ايه لزمة إني اروح ملتقى توظيف

لو انا مش شغال يبقى اجهز السيرة الذاتية بتاعتي واتأكد من انها فيها كل حاجه واقوم نازل الملتقى
واوزع السي في على كل شركة سواء محتاجين محاسبين او مش محتاجين

بتعرف على الشركات اللي نازله هناك ومن الجيد جدا انك تقدر تكون علاقات او معارف لو قدرت من الملتقى

بتتعرف على بيئة ونظام الشركات الكبيرة لو كان الملتقى محترم والناس دي ازاي بتفكر وكده

بعض الشركات بتبقى مش محتاجه محاسبين مثلا بس لما تلاقي السي في بتاعك كويس بتاخده وتكتب من فوق محاسب وتحتفظ بيه لما تحتاج تكلمك وده امسه مخزون مهارات تقريبا مش فاكر

بتخش في مواقف كويسة جدا بتتعلم منها زي ان الشركة اللي رايح تقدم فيها عملتك انترفيو سريع وانت واقف

او سألك الراجل اللي واقف كام سؤال سخيف او عاملك بطريقة معينه عشان يشوف رد فعلك

بيبقى في الملتقيات المحترمة زي الغرفة التجارية الأمريكية والفرنسية في كتاب بيتوزع على رواد الملتقى

بيبقى فيه الكونتاكت بتاعت كل الشركات اللي في الملتقى وده بيفضل معاك عشان بعد كده

لو عزت تبعت السي في بتاعك تاني لأي شركة يبقى عندك الكتاب

وحاجات تانيه كتير بنستفادها من ملتقيات التوظيف

فمهم جدا ان الواحد يروح سواء هو شغال او بيدور على شغل

ولو حد راح ميتكسفش من حاجه كلم الناس هناك كتير وخليك رخم وزن
سلام عليكم
-دي شركة ايه يا فندم
-والله احنا شركة كذا كذا
-طب ايه المجالات اللي انتوا محتاجينها؟
-مهندسين
-مش محتاجين محاسبين
-لا عندنا اكتفاء في القسم ده
-خلاص السي في بتاعي اهه لو احتجتوا ممكن تكلموني

او مثلا
-لا عايزين بس خبرة مش خريج جديد
-ما انا خريج جديد بس كنت بعمل كذا وكذا في الأجازه واتدربت في كذا ومعايا كورسات كذا
-لا لازم خبرة برضه
- طب السي في بتاعي اهه عشان لو احتجتوا لخريج جديد