نصائح ايام الامتحانات

السلام عليكم و رحمة الله و بركاته

كل سنه و انتوا بتذاكروا و شطورين

بما ان الامتحانات خلاص قربت خالص

عايزين كلنا ننصح بعض بالنصايح و الخبرات الى اتعلمناها خلال سنوات حياتنا الدراسيه

و انا هبدأ بسم الله الرحمن الرحيم

بعد 14 سنه خدمه فى التعليم اوجه ليكم النصايح دى :


1- لا للغش .. اوعى تغش و لا تغشش
افتكر من غشنا فليس منا
و هتضيع وقتك و ممكن تتسحب منك الورقه و هتظلم ناس مذاكرة و هتغش المجتمع كله و هتظلم نفسك و غيرك
و مش عشان صاحبك تغششه ..مصلحته انك متغششوش عشان ياخد اللى يستحقه بدل ما تقدم للمجتمع شخص فاشل فى صورة واحد ناجح
و بجد فرحة النجاح بمجهودك ولو تقدير صغير لا تقارن بلو غشيت

2- وازن بين وقت الامتحان و حجم الاجابه
و قسم الوقت على حسب عدد الاسئله و لو مكملتش سؤال بعد ما خلص وقته سيبه و روح لغيره
الامتحان سباق لتجميع الدرجات فحاول تلم اكبر حجم ممكن
لو مثلا مادة عملى و مش هتلحق تجاوب كله اكتب القوانين بسرعه المهم تحاول تجاوب فى الوقت المحدد و تحسس الدكتور انك فاهم

3- الاجابة فى عناصر
عناوين و تحتها شرح مختصر و يفضل استخدام الالوان
و اكتب كل جزئية سؤال فى صفحه لوحدها و متستخسرش الورق و اكتب بخط واضح و كبير

4- قبل الامتحان صلى ركعتين قضاء حاجة و اقرا سورة يس و ادعى ربنا يوفقك

5- وصي كل اللى تعرفهم فى حياتك انهم يدعولك و ادعى انت كمان لكل اصحابك و قرايبك و كل المسلمين

6- استريح تماما قبل الامتحان بساعتين كدة توقف عن المذاكرة و روق دماغك خالص و حاول تتناسى ان عندك امتحان و اهدى و صلى و اقرا قران

7- تجنب انك تشوف اى حد قبل الامتحان بساعتين برضه
عشان و لا يقلقك و لا تقلقه و لا اي مشاكل تحصل تتعب اعصابك يعنى من الاخر خليك قبل الامتحان دعوات و صلاة و قران و بس طول ما انت فى الطريق و بتجهز و كدة

8- فى مراجعة قبل الامتحان حاول تذاكر و تلخص بخط ايدك لنفسك و تعمل المادة فى شكل خريطه و اهتم اوى باليومين اللى قبل الامتحان دول هما اللى بيبقى فيهم التركيز كله .. اوعى تضيعهم او تيأس او تقول مش فاكر اى حاجة (دة شعور طبيعى ان الواحد بيخاف بيحس انه ناسى بس اول ما بيبدا بيلاقى نفسه فاكر الحمد لله ) .. المهم اشتغل و بس
و يوم الامتحان الصبح اصحى بدرى وراجع ملخصك بسرعه كدة

9- خليك فاكر دايما الادعيه قبل و بعد المذاكرة و لو حاجة صعبه و توكل على ربنا فى كل عملك

10- متنساش تاخد معاك ساعة فى اللجنه عشان تشوف الوقت اللى هتقسمه و اتاكد ان كل ادواتك كامله

11- اوعى تخرج قبل الوقت ما ينتهى
هما ساعتين يعنى اصبروا عليهم يمكن تفتكروا حاجة و راجعوا يمكن حاجة غلط و حطوا خطوط تحت الكلمات المحوريه فى الاجابة


12- حاول تحافظ على هدوئك حتى لو عصبى جدا امشى مبتسم و اذكر ربنا هتلاقى نفسك هديت و متشتتش اعصابك فى اللجنه و خليها هاديه و لو لقيتها بقت دوشه قول للمشرف مش عارف اركز


13- ارضى ربنا فى كل اعمالك و ابتعد عن المعاصى لان العلم نور و نور الله لا يهدى لعاصى ذى ما قال الامام الشافعى

14- ساعد اصحابك لو تقدر بس بشرط متعطلش نفسك (يعنى اخرهم ساعه معاك فى اليوم )
و افتكر ان الله فى عون العبد ما دام العبد فى عون اخيه


و لو افتكرت حاجة تاني هقولهالكوا ان شاء الله

و يا ريت انتوا كمان تقولوا نصايحكوا

و يا ريت الردود فى الموضوع تكون فيها نصايح بس عشان الموضوع ميتوهش


ربنا يكرمكم

و ادعولى جاامد جدا

و ربنا يوفقنا كلنا لما يحب و يرضى و يعلمنا ما ينفعنا و ينفعنا بما علمنا و يوفقنا فى الامتحانات

و افتكرت نصيحه مهمه جدا


جدد نيتك قبل المذاكرة و ذاكر بنية انك تتعلم و تنفع المسلمين باللى اتعلمته


و السلام عليكم و رحمة الله و بركاته

ربنا يستر

انا اول مره احسن انى خيفا من الامتحانات كدا

وقعدا بلعب

ابقى اجربها ان شاء الله

بس المهم ارميها قبل الامتحان نفسه عشان يبقى كل شىء فيه مركز مع الامتحان

كان المستر بتاع الرياضه فى ثانوى بيقولنا متاكلوش لبان و انتوا فى الحصة عشان مخكوا كلوا يبقى شغال مع المذاكرة

انا بقى باكل شكولاته عشان بسمع انها بتزود الذكاء و كمان عشان تدينى طاقة


و نزود نصيحة من دكتورة هبه النهاردة

اكتب باسلوب اللى قدامك تتاكد انه هيفهمه و متقولش اصل انا اقصد كذا و هو اكيد هيفهم
لان الدكتور مش هيدخل جوة دماغك و يفهم قصدك

هى قالت ناس كتير بتبقى فاهمه بس الحته دى بتنزللها درجاتها انهم بيكتبوا باسلوب مختصر مش واضح قصدهم ايه

و لو تلاحظوا هى اكدت على حكاية ان شعور طبيعى الشعور بالنسيان

و ربنا معانا كلنا

إن شاء الله أعمل بانصايح دي

رعب ايام الامتحانات جه
بس نصايح كويسه يا ندي و كمان بتاعت مصطفي بتاعت اللبان

انا اكتر حاجه بتضايقني بقي في يوم الامتحان تلاقي واحد ماسك الملزمه و قبل ما يدخل اللجنه بثواني يقعد يراجع فيها و يبقي خلاص المراقب هاياخدها منه يبقي عايز يلحقله بصتين ال يعني خلاص البصه دي هايقفل فيها الامتحان

ربنا يوفقنا ان شاء الله كلنا و ربنا معانــــــا

امين يا رب العالمين

و فعلا عندك حق .. مع ان لو ريح اعصابه شويه و قرا سورة يس و دعا لنفسه ولاصحابه كدة قبل الامتحان هيرتاح و هيعمل احسن ان شاء الله

زاكى الله خيرا

وشكرا ع النصيحه

نصاح جااااامدة جدااا

وفعلا لو طبقناها ممكن تفرق معانا كتييير


ربنا يكرمك

ربنا يكرمكوا

في حاجة مش جديدة قوي :
لازم تكون عارف انك مش بتنجح بمزاكرتك ولا مجهودك
ولكن بتوفيق ربنا ليك
فلازم تكون مع ربنا دايما وتحاول ان ربنا يكون راضي عنك دايما
ومتفكرش ان العبادة هتعطلك عن المزاكرة
ابدا ابدا
اعمل إللى عليك وسيب الباقي على ربنا ..

للأسف معنديش ما اضيفه تاني
انتوا قلتوا كل حاجة

ربنا بقي يكرم كل إللى كتب اي نصيحة في الموضوع دة

حلوة النصايح دى يا ندود

بس معادا النصيحة 7 ، 8 ، 14
انا مش بعملهم

اصلى براجع قبل الامتحان علشان غالبا بكون مش خلصت حفظ
علشان انا بحفظ ليلة الامتحان ويوم الامتحان الصبح علشان الmemory عندى قصيرة

وكمان انا غالبا بشوف كل الناس عادى قبل الامتحان
وبحب اسلم عليهم
بجد فى ناس مقدرش ادخل اللجنة من غير ما اطمن انهم وصلوا وفى لجانهم
وطبعا اولهم مصطفى اخويا

وكمان انا ممكن ادى اصحابى اكتر من ساعة يعنى كمذاكرة او اى حد عادى
بصراحة مش بقدر اشوف حاجة ممكن اساعد بيها حد ومعملهاش
بس طبعا بحاول اوازن علشان اخلص انا كمان بس ممكن اضغط على نفسى شوية
وبرضه من قدم السبت يعنى

بس تسلم ايدك بجد على الموضوع

شكرا على النصايح دي
ربنا معانا

ميرسى يا نودى على النصايح القيمة دى وربنا يكرمك ويحميكى يارب
بس اكتر نصيحة مهمة
من نام واستراح جاء لة النجاح
وادعولى جامد انى اهدى اعصابى ...........

اقتباس :

في حاجة مش جديدة قوي :
لازم تكون عارف انك مش بتنجح بمزاكرتك ولا مجهودك
ولكن بتوفيق ربنا ليك

دعاء الوالدين هو ده مفعول السحر فى الأمتحان وفى النتيجة فى الأخر

طبعا دعاء الوالدين دة اكتر من السحرى و الالتزام بالعبادات ذى ما قال ذا مانجر

و حلوة يا بسبوسه من نام و استراح هههه

و ربنا يكرمك يا مها و طبعا كل انسان و ليه شخصيته و طريقته و ظروفه و هو اكتر انسان قادر على حل مشاكله

فهماكى يا حبيبتى

ربنا يكرمك

ادعيلى جامد